Vandag is Woensdag 14 Junie en ons dink die week ’n bietjie na oor die kerklike seisoen van Koninkrykstyd waarbinne ons onsself bevind. Met die wegspring van hierdie tydperk besin ons oor die Triniteit en ons deelname saam met God. Daaom lees ons elke oggend die aanhaling van Richard Rohr vanuit sy boek “The Devine Dance” te luister:
“The Holy Trinity is what flows under, around, and through all things – Father, Son, and Holy Spirit divinely dancing. The Holy Trinity is what we enter into as God’s beloved creation; our participation in the flow and divine dance enables us to be generous, serve others, and experience connection, harmony, and love.”
Die vraag vir ons vanuit hierdie aanhaling die week is:
- Hoe raak ons deel van hierdie vloei saam met die Triniteit?
- Hoe neem ons deel?
Om ons daarmee te help luister ons saam na ’n gedig van Neels Jackson genoem vissers van mense:
Vissers van mense
van visse en bote en nette het hulle alles geweet
die water het hulle geken
maar toe kom die vreemdeling
en Hy roep hulle
en Hy belowe
Hy sal hulle vissers van mense maak
hulle het dit nie mooi verstaan nie
maar opgestaan en saamgegaan
hoeveel kere daarna het hulle nie gesien
hoe Hy die werpnet van besorgdheid uitgooi nie
na verlamdes en blindes en melaatses
na skares wat honger na hom kom luister het
in die stilmaak van die storm
die onhelsing van kindertjies
in die sagte uitnodiging aan almal wat oormoeg is
om tot rus te kom
by Hom
later in die bloedige gee van Homself
en toe hulle die trekkrag voel
van liefde wat gee
wat heelmaak
het hulle verstaan wat Hy aan die begin gesê het
oor vissers van mense