Die breër spasie van my verhoudings:
Die bekende skrywer Steven Covey het geskryf: “Most people do not listen with the intent to understand; they listen with the intent to reply.” Ek vang myself baie keer dat ek mense hoor, maar nie behoorlik na hulle luister nie. Dit is juis omdat ek weet dat ek ’n terugvoer moet gee op die vraag wat hulle vra of die storie wat hulle vertel. Luister is dus nie die vermoë om net te hoor en dan te reageer nie, maar dit is om werklikwaar in iemand anders se skoene te staan en om hulle spasie te gee om plek in jou gedagtes te kry.
Om spasie te skep binne verhoudings is sterk gekoppel aan die vermoë om te luister. Ons is geneig om net te luister na stemme wat vir ons bekend is, of stemme wat ons vertrou. Jesus se metodiek was juis om die buitestemme ruimte te gee om te praat en Hy het self ook dan na hierdie stemme geluister.
Markus 4:21. Hy het vir hulle gesê: “’n Lamp kom mos nie onder ‘n emmer of onder ‘n bed nie? Is dit nie bedoel om op ‘n staander gesit te word nie? 22Daar is geen geheim nie, of dit moet openbaar gemaak word; en daar word niks geheim gehou nie, of dit moet aan die lig kom. 23As iemand ore het en kan hoor, moet hy luister!”
24Hy het ook vir hulle gesê: “Gee aandag aan wat julle hoor! Want met die maat waarmee julle meet, sal vir julle gemeet word en daar sal vir julle nog toegevoeg word. 25Wie het, vir hom sal daar nog meer gegee word; en wie nie het nie, van hom sal ook die bietjie wat hy het, weggevat word.”
Jesus sê hier vir die mense dat om te luister is om verlig te word en bewus te word van wat om jou aan die gebeur is. As iemand kan hoor moet hulle luister. In ons verhoudings kan ons baie maklik die persoon wees wat hoor en praat, maar ons is selde die persoon wat spasie skep sodat ander stemme ook die ruime betree. Jesus nooi ons om integraal te lewe om ruimte te skep in ons verhoudings deur te luister. Om te luister nie net na stemme wat vir ons bekend is nie, maar ook na die onbekende stemme.
Gebed:
Here, mag ons leer om te luister. Mag ons meer en meer soos U word deur nuwe stemme in ons lewe die geleentheid te gee om te praat. Mag ons oop wees sodat ander kan deel word van ons lewe. Dankie Here, dat U vir ons uitdaag om spasie te skep in ons verhoudings.