Die Woestynvaders en moeders was ’n groepie gelowiges wat ’n paar jaar na Jesus se dood in ’n klooster in die woestyn gewoon het en hulle lewe aan gebed gewy het. Een van die gebedsrituele wat hulle elke oggend ingeoefen het, was ’n ritueel wat hulle gehelp het om bewus te word van God wat oral rondom hulle is. Hierdie ritueel was genoem ’n asemhalingsgebed. Ek wil jou nooi om dit vanoggend saam met my te doen. Vir die volgende paar oomblikke maak jou oë toe en haal rustig asem in en uit. Probeer om dit wat swaar op jou skouers rus en dit wat jou gedagtes vol maak eenkant toe te skuif en in jou gedagtes vir jouself te sê – Ek gaan nie nou daaraan tyd spandeer nie, ek sal dit later doen.
Terwyl jou oë toe is en jy rustig inasem sê met elke inaseming in jou gedagtes vir jouself – “God se Gees is in my”. En elke keer as jy uitasem, wil ek vir jou vra om in jou gedagtes vir jouself te sê – “God se Gees is by my.”
Terwyl ons so in gebed bly lees ek graag vir julle ons oggendgebed:
Here, God, U is oral;
In lig en donkerte,
In volheid en pyn,
In hoop en onsekerheid.
U is soos ’n mantel om my:
Alles wat met my gebeur, gebeur eers met U;
Daarom is ek nooit alleen nie.
U loop voor, U loop saam,
U dra en U huil.
Here God, U is oral
En U “wees” is altyd dienend en vol deernis.
Daarom kan ek my altyd in u hande oorgee.
Amen