Hebreërs 12:2: “die oog gevestig op Jesus, die Begin en Voleinder van die geloof. Ter wille van die vreugde wat vir Hom in die vooruitsig was, het Hy die kruis verduur sonder om vir die skande daarvan terug te deins, en Hy sit nou aan die regterkant van die troon van God.”
Mense sê dikwels ’n mens moenie ’n goeie storie met feite bederf nie, maar ek het die storie wat êrens op die platteland afgespeel het gehoor en die dame wat dit oorvertel het, het dit met groot sorg gedoen. ’n Jong ma het blykbaar op en af langs die rugbyveld gehardloop om die plaaslike rugbyspan en veral haar seun wat vleuel gespeel het, aan te moedig om ’n drie te druk. Ons moet darem onthou dat op daardie ouderdom is die manne geneig om net die bal onder die arm te druk en dan so vinnig moontlik te hardloop, soms in die verkeerde rigting in. So het klein Jannie toe ook die bal onder sy arm vas geknyp, op sy tande gekners en laat spaander om die drie te gaan druk. Sy ma het langs die veld af gehardloop terwyl sy skree: “Hol, Jannie”. Ongelukkig het Jannie net voor die doellyn oor sy eie voete gestruikel en die bal het uit sy hande gespat, en dis toe dat Jannie se ma systap, die bal optel en netjies agter die doellyn gaan druk! Ek is nie doodseker of die storie waar is nie, maar dit is ’n bewys waartoe passie, entoesiasme, ondersteuning en totale betrokkenheid ’n mens in staat kan stel.
Ek het gedink hier waar die jaar nou einde se kant toe staan is dit miskien wat ons vandag in ons land ook nodig het, te midde van die swartgalligheid en die pessimisme wat op so baie mense, oud en jonk, toesak. Ek wil nou nie praat oor die negatiewe dinge in ons land nie, en hoe ’n mens eintlik die gevoel kry dat ons nou begis is om die bal te verloor nie.
Iemand wat ’n tyd gelede deur die Afrikalande getoer het, het onder die indruk gekom van hoe vriendelik en gasvry die mense is. Toe hy vir iemand vra, as ek reg onthou wat in Malawi gewoon het, hoekom hulle so vriendelik is, het die man vir hom geantwoord: “Het U nie geweet dat ons hier Christene is nie?” Is ons nie ook gelowiges nie? Jesus het vir sy dissipels gesê in Johannes 10:9 “Ek het gekom dat julle die lewe kan hê in oorvloed.” Maar dit beteken nie altyd dat alles altyd reg moet loop nie. Die vraag is of ons iets van die oorvloed in ons eie lewens demonstreer? Kom ons span saam en tel die bal op. Ons moet die bal gryp en die drie gaan druk soos Hebreërs 12:3: “Met die oog gevestig op Jesus.” Kom ons laat onsself nie toe om so negatief beïnvloed te word deur baie ander dinge nie. Ons moet ook die simboliese drie in ons eie omstandighede gaan druk.
Gebed
Here help vir ons om ons nie negatief te laat beïnvloed deur dit wat ons in die koerante of in die media lees nie, maar dat ons eerder ons oë op Jesus Christus, gevestig sal hou, die begin en die einde van die geloof. Amen.