Markus 14:45-46. “Toe hy dan daar kom, het hy reguit na Jesus toe gegaan en gesê: “Die een wat ek sal soen, dit is hy. Gryp hom en vat hom weg. Moenie dat hy ontsnap nie”.
Vandag se teks bring ons in die Groot Lydensweek uit by die aand toe Judas Jesus verraai het. Die handeling het die gebeure van Jesus se kruisiging en sterwe aan die gang gesit. Die doel van die Groot Lydensweek is om ons op ’n reis te neem. Wanneer ons dus weer in hierdie week die gebeure herroep is dit nie bloot net ’n herhaling van ’n ou bekende reeks verhale nie. Die week vra van ons om letterlik saam te stap en die emosie van elke oomblik aan ons lywe te voel. Die opgewondenheid van die Paasfees herinner gesinne en families dat God hulle lank terug van slawerny bevry het. Die spanning wanneer Jesus deur Judas verraai word en waarop ’n grusame lydensweg volg. Soos wat Jesus in die teksgedeelte gevangene geneem was, kan ons ook nie van die realiteit van lyding of ander sake wat ons gevange hou, ontsnap nie. Ons moet op een of ander manier daardeur kom. Voor watter realiteit, waarvan jy nie kan ontsnap nie, bring 2021 se lydenstyd jou?
Gebed
Here, ek is verward en oorstuur. Die wêreld om my is een stuk sinlose aktiwiteit: gesprekke wat so dikwels nêrens heen gaan nie, vergaderings wat by geen uitkomste uitkom nie. Ek self vaar nie beter nie, ek staan voor keuses en besluite en weet nie watter weg om te volg nie. Plaas u hand op my skouer en laat u krag my swakheid binne vloei; laat u lig die donker uit my hart verdryf. Gee my die geloof om dit vandag saam met U in die storm van my gevangenisskap te waag.