Levitikus 25:23. “Geen grond mag permanent verkoop word nie, want die land behoort aan My. Julle is slegs vreemdelinge en bywoners by My”.
Een van die groot strydpunte in die jarelange konflik tussen Israel en die Palestyne gaan oor die besitreg van grond. Aan wie behoort dié land? Beide nasies het ‘n baie sterk affiniteit met die grond. Voor 1948 toe die staat van Israel tot stand gekom het is die land vir etlike generasies deur die Palestyne bewoon en 2500 jaar terug was dit vir ‘n tyd deur die konings van Israel en Juda regeer. Beide Netanyahu se politieke party en Hamas sien vandag ‘n toekoms waarin die reg op grond net vir een nasie beskore is. Jerusalem het al 52 periodes van oorlog beleef en is seker dié stad in die wêreld wat die meeste kere verower is. Ironies genoeg beteken Jerusalem, “Stad van vrede”. Lees weer in Lukas 13:31-35 wat Jesus oor hierdie stad se vrede sê.
Koos du Plessis het die bekende liedjie geskryf met die titel “Gebed”, wat sê:
Elke dag is ’n gedagte.
Elke kamer net gehuur.
Elke aardse droom van rykdom en roem,
net ‘n skadu teen die muur.
Wat ek is, is net genade,
wat ek het is net geleen.
Eintlik smag ek na U waters van rus.
Lei my, Heer vanaand daarheen.
Die konflik wat in Israel aan die gang is herinner aan ons eie land se onlangse geskiedenis waarin mense vir hulle eie bestaansreg baklei het. Koninkryke en politieke partye kom en gaan. Uit die geskiedenis is dit duidelik dat besit van grond altyd net tydelik is. Ons sou oor die afgelope dekades van ‘n demokratiese Suid-Afrika kon terugkyk en kla oor die spanning wat nog tussen mense leef. Die prentjie in Israel vandag herinner aan hoe dinge dalk kon gelyk het. Hoe praat die Here met ons oor hoe ons vandag met verskillende mense moet saamleef? Wat is die vrede wat die Here ons te midde van uitdagings kom wys? Waarheen lei Hy jou heen?
Gebed
Here, wanneer ons bely dat U die Skepper van hemel en aarde is, bely ons dat alles aan U behoort. Geen nasie of volk of heerser kon nog ooit aan sy eie koninkryk vashou nie. Alles wat ons het is tydelik, behalwe vir die vrede wat U in ons aardse lewe vir ander en onsself kan bring. Help ons vandag om hierdie perspektief in ons hede te sien eerder as om vir konflik te kies. Onse Vader gee my vandag, my dag se brood. Net genoeg sodat daar genoeg is vir almal wat om my leef. Maak my vergenoeg met wat ek het. Maar nog meer, wys my vandag die vrede in die midde van vandag se uitdagings waarmee ek hierdie wêreld ‘n beter plek kan maak. Amen.