Matteus 4:4. ‘n Mens leef nie net van brood nie maar van elke woord wat uit die mond van God kom.
Jesus het die woorde van hierdie teks gespreek toe hy vir veertig dae en nagte niks geëet het nie en naderhand honger geword het. Die duiwel het verskyn en hom versoek om die klippe in brood te verander. Sy reaksie was: ’n Mens leef nie net van brood nie, maar van elke woord wat by die mond van die Here uitkom. Jesus leer ons in die Onse Vader gebed om God te vertrou vir ons dag se brood. Wat het ons nodig om te kan lewe? Daar is elke dag ’n groot aantal onmiddellike behoeftes wat ons aandag verg en waarsonder ons nie kan klaarkom nie. In vandag se teks kom verander Jesus ons gedagtegang daaroor. Die gedeelte laat ons ‘n week voor die Kerstyd nadink ooor wat ons in die lewe versadig en krag gee. Terwyl ons probeer om dit te onderskei en in die versoeking is om maar net soos altyd aan te gaan, herinner vandag se teks ons aan die leiding van God se woorde. Ons hoor dit nie net Sondae wanneer ons in die kerk sit of moeite doen om iewers in die dag stiltetyd te hou nie. God is in elke oomblik van die dag se gebeure by ons om deur mense, gebeure en ons gedagtegang tot ons te spreek. In Jesus se menswording sien ons skielik God oral om ons op ’n ander manier. Die versoeking om net aan ons eie behoeftes te dink en daarby vas te haak is groot. Vertrou dat die Here jou vandag jou dag se brood sal gee om jou honger (behoeftes) te stil, maar leef ook vandag met die bewuswording van hoe hy deur hierdie dag se gebeure jou wil kom voed om ’n betekenisvolle dag te mag beleef.
Gebed
Here, in hierdie oggend is daar weer soos elke oggend ‘n warboel gedagtes wat in my leef oor die dag wat vir my voorlê. Dinge wat ek moet doen en klaarkry en die versoeking is groot om net aan my eie behoeftes te dink en hierdie dag so in te rig dat ek die wins en voordeel daaruit kan put. Spreek vandag tot my. Help my om U stem vandag in die natuur en deur mense en gebeure te hoor. Help my om elke situasie en emosie te kan onderskei en opnuut vandag te beleef hoe U woorde my vandag kom voed.
Amen.