Mag jy op hierdie eerste dag van die nuwe jaar vashou aan die troos dat net soos God jou gedra het in die jaar wat was, net so sal God ook by jou wees in hierdie nuwe jaar wat voor ons lê. Mag dit vir jou ‘n troos wees soos wat jy in die onbekende in stap. Mag jy weet dat jy veilig in God se hande is en daarom kan jy maar meer lief hê, meer kanse waag, meer genade uitdeel en meer kere vergewe.
Ek lees graag een van die eerste seen gebede van die vroeë kerk:
Die Here is voor jou om die pad gelyk te maak.
Die Here is langs jou om jou hand vas te hou.
Die Here is agter jou om die Bose te verslaan.
Die Here is onder jou om jou te dra as jy swak is en jou op te help as jy val.
Die Here is rondom jou om jou te beskerm.
Die Here is bokant jou om jou te seën.
Die Here is binne-in jou, want Hy lei jou deur sy Heilige Gees.
Die Here is vir jou, want Jesus pleit vir jou.
Die Drie-enige God is by jou, van nou af tot in ewigheid.