Dagstuk | Saterdag 13 April 2024
Vandag is Saterdag 13 April en in hierdie week reis ons saam deur die laaste deel van die gemeente se geloofsbelydenis: Om voordurend te vernuwe.
Ons het die week bietjie gesels oor die feit dat ons deur Jesus Christus se kruisiging, lyding, dood en opstanding nuwe mense geword het en dat ons as nuwe mense deur God se bril na die wêreld moet kyk. Ons het daaroor nagedink dat om deur God se bril te kyk dit belangrik is dat ons by sy voete rus vind en met hom tyd spandeer, maar ook dat om deur sy bril te kyk is dit belangrik om soos mense wie se Verlosser leef, te leef. Om te lewe asof ons verlosser leef word ons uit ons gemaksone gedwing en dieselfde geld om deur die bril van God na die wêreld te kyk.
Kom ons lees Lukas 19:1-10 saam:
Jesus en Saggeus
1Jesus het in Jerigo gekom en was op pad deur die stad. 2Daar was ‘n man met die naam Saggeus, die hooftollenaar, ‘n ryk man. 3Hy het geprobeer om Jesus te sien, maar weens die skare kon hy nie, omdat hy te kort was. 4Hy hardloop toe vooruit en klim in ‘n wildevyeboom om Jesus te kan sien, want Hy sou daar verbygaan. 5Toe Jesus by die plek kom, kyk Hy op en sê vir hom: “Saggeus, kom gou af, want Ek moet vandag in jou huis tuis gaan.”
6Hy het toe gou afgeklim en Jesus met blydskap ontvang. 7Almal wat dit gesien het, het beswaar gemaak en gesê: “Hy gaan by ‘n sondige man tuis!”
8Maar Saggeus het opgestaan en vir die Here gesê: “Here, ek gaan die helfte van my goed vir die armes gee, en waar ek iets van iemand afgepers het, gee ek dit vierdubbel terug.” 9Daarop sê Jesus: “Vandag het daar redding vir hierdie huis gekom; ook hierdie man is ‘n kind van Abraham. 10Die Seun van die mens het immers gekom om te soek en te red wat verlore is.”
Wanneer ons die teks lees sien ons dat die skare geskok was dat Jesus by ’n sondige man gaan eet, maar Jesus het nie omgegee wie Saggeus was nie. En so ook om voortdurend te vernuwe en as nuwe mense wat God se brille dra, is dit belangrik dat ons ander hanteer soos Jesus ander mense hanteer het en oor grense heen uitreik. Om te lewe asof Jesus Christus ons Verlosser is, is dit nodig om op te tree soos Jesus sou optree en mense met menswaardigheid, liefde en genade te hanteer omdat Jesus ons met menswaardigheid, liefde en genade sou hanteer.
Ek wil ons uitdaag met die laaste uitdaging die week dat as ons voordurend wil vernuwe en wil lewe as nuwe mense met God se bril aan, dat ons werklik onsself sal uitdaag om deur God se oë na die wêreld te kyk.
Kom ons bid saam:
Dankie Here dat U vir ons aan die kruis gesterf het en dat ons deur U kruisging, lyding en opstanding nuut gemaak is. Here dankie dat U vir ons kom wys het dat almal deelvorm van U koninkryk. Help ons om konstant na die wêreld deur U bril te kyk. Help ons om konstant uitgedaag te word om oor grense heen uit te reik en te lewe asof U ons verlosser is.
Amen
Dagstuk | Vrydag 12 April 2024
Vandag is Vrydag, 12 April en in hierdie week reis ons saam deur die laaste deel van die gemeente se geloofsbelydenis: Om voordurend te vernuwe.
Ons het hierdie week begin deur te fokus op die feit dat ons deur Jesus se kruisging, dood en opstanding nuwe mense geword het wat deur God se bril na die wêreld moet kyk en om dit te doen is dit nodig om tyd te maak vir God en by sy voete te sit.
Ons almal vorm deel van een liggaam waar Jesus Christus die hoof is en almal vir God ewe belangrik is.
Kom ons lees Efesiërs 4 vers 1 tot 6 saam:
1Ek druk julle dit op die hart, ek wat ‘n gevangene is omdat ek die Here dien: Laat julle lewenswandel in ooreenstemming wees met die roeping wat julle van God ontvang het. 2Wees altyd beskeie, vriendelik en geduldig, en verdra mekaar in liefde. 3Lê julle daarop toe om die eenheid wat die Gees tussen julle gesmee het, te handhaaf deur in vrede met mekaar te lewe. 4Daar is net één liggaam en net één Gees, soos daar net één hoop is waartoe God julle geroep het. 5Daar is net één Here, één geloof, één doop, 6één God en Vader van almal: Hy wat oor almal is, deur almal werk en in almal woon.
Deur die teks probeer Paulus ons uitnooi om te besef dat God in alles en almal woon en dat ons dus moet omsien na alles en almal en ook alles en almal met liefde, genade en respek moet behandel. Ons moet omsien na mekaar en mekaar met baie liefde hanteer, maar ook moet ons omsien na die gemeenskap rondom ons en die naturskoon waarmee die Here ons elke dag seën. Om as nuwe mense te lewe word ons uitgenooi om orals op te tree soos Jesus sou optree en almal dieselfde te hanteer want almal is tog ewe belangrik vir Jesus.
Die teks wys ook vir ons dat as ons nader aan God groei en tyd maak vir hom sal ons nader aan mekaar groei. God het ons meer lief as wat ons ooit kan dink en dus met dieselfde liefde van God nooi God ons uit om ander mee te hanteer.
Ek wil julle vandag uitdaag om in jul stiltetyd weer die teks te lees en neer te skryf wat vir jou uitstaan.
Kom ons bid saam:
Here, help ons om vandag nuut te lewe en na die wêreld te kyk deur u bril. Here help ons om na mekaar en na die aarde om te sien en almal met dieselfde liefde, genade en respek te behandel. Dankie Here, dat ons weet dat ons vir U so belangrik is dat U vir ons aan die kruis gesterf het. Here dankie vir u liefde vir my.
Amen
Dagstuk | Donderdag 11 April 2024
Vandag is Donderdag, 11 April. Hierdie week reis ons saam deur die laaste deel van die gemeente se geloofsbelydenis: Om voordurend te vernuwe.
Ons het deur die week gehoor dat ons nuwe mense in Jesus Christus is en dat ons dus na die wêreld moet kyk deur God se bril. Gister het ons ’n bietjie gesels oor hoe belangrik dit vir ons is om tyd te maak vir God sodat ons deur sy bril na die wêreld kyk.
As nuwe mense wat hul identeit in Christus vind moet ons lewe asof Jesus Christus werklik ons Verlosser is. Ons moet lewe met dankbare harte dat Jesus Christus in beheer is.
Kom ons lees Matteus 28:5-8 saam:
5Toe sê die engel vir die vroue: “Julle moet nie bang wees nie. Ek weet julle soek Jesus wat gekruisig is. 6Hy is nie hier nie, want Hy is uit die dood opgewek, soos Hy gesê het. Kom nader en kyk: daar is die plek waar Hy gelê het. 7Gaan gou en sê vir sy dissipels: ‘Hy is uit die dood opgewek, en Hy gaan julle vooruit na Galilea toe. Daar sal julle Hom sien.’ Dit is wat ek vir julle moes sê.”
8Hulle het toe haastig van die graf af weggegaan, bang maar baie bly, en hulle het gehardloop om dit aan die dissipels te vertel.
Ons moet net soos wat die vroue gehardloop het om die Goeie Nuus van Jesus Christus te verkondig, net so moet ons ook hardloop om aan die wêreld te verkondig dat Jesus Christus leef. Ons moet deur ons woorde en dade verkondig dat Jesus ons Verlosser werklik lewe. Dat Hy in beheer is. Dat ten spyte van al die seer en situasies van wanhoop, dat HY ons hoop is, want HY het die dood oorwin.
Ek en jy is soms die enigste stukkie Jesus wat sommiges ooit sal ontmoet. Moeder Theresa het gesê dat ons moet onsself beskikbaar stel sodat ons ’n potlood vir die Here kan wees waarmee Hy, deur ons, aan die wêreld ’n liefdesbrief kan skryf.
Ek wil hê ons moet ’n oomblik neem en vir Christus dankie sê vir sy kruisiging, dood en opstanding en dat Hy hierdeur vir ons hoop bring, maar ek wil ook hê dat ons die Here vra om ons te help om regtig te lewe asof Hy ons Verlosser is.
Kom ons bid saam:
Dankie Here dat U ons so oneidnig lief gehad het dat U vir ons aan die kruis gesterf het. Dankie dat ons weet dat omdat U lewe het ons hoop vir môre. Here, ek vra dat U ons sal help om daagliks nuut te lewe en daagliks aan mense te verkondig dat U ons verlosser is. Amen
Dagstuk | Woensdag 10 April 2024
Vandag is Woensdag, 10 April en hierdie week reis ons saam deur die laaste deel van die gemeente se geloofsbelydenis: Om voordurend te vernuwe.
Ons het Maandag gehoor dat ons nuwe mense is in Christus, gister het ons gehoor dat ons na die wêreld moet kyk deur God se bril.
Vandag gaan ons kyk na die verhaal van Lukas 10:38-42. Hierdie verhaal wys vir ons wat vir Jesus belangrik is. Dit vertel ietsie van hoe ons daagliks vernuwe kan word.
Kom ons lees saam: 38Op hulle reis het Jesus in ‘n dorp gekom waar ‘n vrou, Marta, Hom as gas ontvang het. 39Sy het ‘n suster gehad, Maria, wat aan die voete van die Here gaan sit en na sy woorde geluister het. 40Maar Marta was baie bedrywig om alles klaar te maak. Sy kom toe daar staan en sê: “Here, hinder dit U nie dat my suster my alleen laat bedien nie? Sê sy moet my kom help!”
41Maar die Here antwoord haar: “Marta, Marta, jy is besorg en bekommerd oor baie dinge, 42maar net een ding is nodig. Maria het die beste deel gekies, en dit sal nie van haar weggeneem word nie.”
Ons is soms net soos Marta wat jaag van punt a na b en met die skoolvakansie wat verby is, is alles weer “back to normal” maar Jesus herhinner ons hier dat om voordurend vernuwe te word dit nodig is om tyd te maak by sy voete. Om deur God se bril te kyk is dit nodig om rustig te raak by Hom. Wanneer ons rustig raak by sy voete word ons nie net bewus van God se wil nie, maar kry ons ook nuwe krag en energie vir die lewe. Moeder Theresa skryf: “Gebed is om jouself in die hande van God te plaas, tot sy beskikking, en om na sy stem in die diepte van ons harte te luister”.
Ek wil ons vandag uitdaag om ’n oomblik in jou dag net ’n tydjie te maak om by God se voete rus te vind.
Kom ons bid saam:
Dankie Here, dat U saam met ons tyd wil spandeer. Dankie dat U wil hoor hoe dit met ons gaan, Here. Here, ek vra U om ons te help om tussen al die gejaag van die wêreld ’n tydjie te kry om by u voete te kom stil staan en om vernuwe te word en met u oë na die wêreld te kyk. Amen
Dagstuk | Dinsdag 9 April 2024
Vandag is Dinsdag, 9 April en hierdie week reis ons saam deur die laaste deel van ons gemeente se geloofsbelydenis: Om voordurend te vernuwe.
Ons het gister gehoor dat ons met Christus se kruisging, dood en opstanding nuut gemaak is en dat ons identiteit in Jesus Christus lê.
Om voordurend te vernuwe is dit nodig dat ons na die wêreld kyk deur God se liefdevolle bril. Dit is nodig dat ons God se bril konstant dra.
Ons wonder sekerlik hoe kan ons deur God se bril na die aarde kyk?
Romeine 12:2 sê die volgende: “Julle moenie aan hierdie sondige wêreld gelyk word nie, maar laat God julle verander deur julle denke te vernuwe. Dan sal julle ook kan onderskei wat die wil van God is, wat vir Hom goed en aanneemlik en volmaak is.”
Romeine sê dat ons ons denke gerig moet hê op die Here sodat Hy ons kan verander en vir ons kan help om Sy wil op aarde te volg. Een manier om dit te doen is deur tyd in die teenwoordigheid van die Here te spandeer.
Ek wil ons vandag uitdaag om waar ons ook al gaan deur God se bril na die wêreld te kyk en na te dink oor wat Jesus sou doen?
Kom ons Bid saam:
Here dankie vir U. Dankie dat ons nog ’n dag vir U kan lewe. Dankie dat U vir ons aan die kruis gesterf het sodat ons ook nou rondom U tafel kan sit en mense na U tafel toe kan nooi. Dankie Here dat ons skoon gewas is van al ons sondes en skuld en help my om die week na die wêreld te kyk deur U bril
Amen
Dagstuk | Maandag 8 April 2024
Vandag is Maandag, 8 April en ons gaan hierdie week bietjie saam reis deur die laaste deel van ons gemeente se belydenis: Om voordurend te vernuwe.
Ons het sowat twee weke terug op Jesus se kruisiging, dood en opstanding gefokus. Ons het gevier dat Jesus vir my en vir jou so lief gehad het dat Hy bereid was om pyn en lyding te ervaar sodat ek en jy van ons sonde, skoon gewas kan word. Sodat ek en jy nuwe mense in Christus kan word.
2 Korintiërs 5:17 Sê “Iemand wat aan Christus behoort, is ‘n nuwe mens. Die oue is verby, die nuwe het gekom”.
Nou om voordurend te vernuwe is dit nodig dat ons lewe asof ons nuwe mense in Christus is. Ons moet lewe asof Jesus Christus ons Verlosser lewe en ons ’n tweede kans gegee het op die lewe.
James, E, Faust het gesê: “The thankful heart opens our eyes to a multitude of blessings that continually suuround us”.
Dis om die seëninge rondom ons raak te sien en die Here daarvoor te dank.
Ek wil julle uitdaag om ’n oomblik te sit en stil te word en na te dink oor wat dit vir jou beteken dat Jesus vir ons ’n nuwe identiteit gegee het deur sy kruisging, dood en opstanding.
Gebed:
Here dankie vir U onvoorwaarlike liefde. Dankie vir al u seëninge in ons lewens, al kyk ons dit dikwels mis. Dankie dat U vir ons sondes aan die kruis kom sterf het, sodat ons skoon gewas kon word van ons sondes. Here gee ons vandag insig hoe om daagliks te lewe soos iemand wie se identiteit in U gevestig is. Help ons om met u bril na die aarde te kyk.
Amen
Dagstuk | Saterdag 6 April 2024
Vandag se tema: Klein dade wat ‘n groot verskil maak.
Matteus 25:40-41. Dit verseker Ek vir julle: Vir sover julle dit aan een van die geringste van hierdie broers van My gedoen het, het julle dit aan My gedoen.
Wanneer maak ons ‘n werklike verskil? Die een na die ander besig dag verloop in ons lewens. Oorweeg die volgende ervaring: Hoe sou dit jou lewe raak om in die laaste halfuur van jou dag jou werk te evalueer? Wat is die dinge wat vandag by jou en mense die grootste impak gemaak het? Wat was die spesiale oomblikke van die dag? Hoe is die betekenis van daardie oomblik nog besig om met jou te praat? Ons beoordeel gewoonlik die sukses van ‘n werksdag aan die groot en uitsonderlike dinge wat ons gedoen gekry het en waaraan ons ons sukses meet. Dit gebeur ook nie aldag nie en kom net nou en dan oor ons pad. Vir die meeste van die tyd moet ons onbenullighede of roetine werk hanteer waarvan ons nie veel dink nie. Vandag se teksgedeelte bring skielik by ons ‘n ander perspektief. Dit is in die daaglikse dade van opregtheid wat ons die grootste verskil kan maak en wat op die einde vir ons uitstaan. Om met ‘n verskil te leef is nie moeilik of uitsonderlik nie. Die Here bring ons daagliks voor die geleentheid wanneer ons juis met geringe mense te doen kry.
Gebed
Here, help my vandag om die waarheid oor myself in die oë te kyk: om myself vir ‘n wyle te sien soos U, en ander, my sien. Help my om my woorde en stemtoon te hoor soos dit vir ander klink. Maak my eerlik genoeg om my arrogansie raak te sien en my liggeraaktheid en selfsug te erken. Ek bid dit alles omdat ek glo dat ek hierdeur met ‘n groot verskil kan leef.
Dagstuk | Vrydag 5 April 2024
Vandag se tema: Nuwe ervaringe en geleenthede wat ‘n verskil maak.
Jesaja 43:19. Kyk, Ek gaan iets nuut doen, dit staan op die punt om te gebeur, julle kan dit al sien kom. Ek maak in die woestyn ‘n pad, Ek laat in die droë wêreld riviere ontspring.
Albert Einstein het gesê: “You cannot solve a problem from the same level of consciousness that created it”. Dit sluit mooi aan by gister se dagstukkie wat van ons vra om God toe te laat ons ons denke te verander, maar moedig ons ook vandag aan om ons vir nuwe ervaringe oop te stel. Ons kan nie verander terwyl ons tergelyke tyd op dieselfde plek bly nie. Ons het nodig om blootgestel te word aan nuwe ervaringe in ons hede en ‘n ander vlak van dink en doen. Dit is waarna die teksgedeelte ons uitnooi. Dink aan die beeld wat die teksgedeelte oproep? Dit is bykans onmoontlik om ‘n pad tussen die sandduine in ‘n woestyn te maak en vir ‘n rivier om sommer so in ‘n droë wêreld te ontspring. Tog, is dit iets wat die Here kan doen en ons uitnooi om in ons hede te beleef. Het jy dalk iewers in die lewe op ‘n vlak vasgehaak waar jou probleme aan jou vasklou? Voor watter ervaring, “wat op die punt staan om te gebeur”, bring die Here jou uit? Mag jy die moed hê om jou vandag daarvoor oop te stel en te beleef watter groot verskil dit in jou lewe kan bring.
Gebed
Here, ek slaag dikwels nie om fyn na U te luister nie. Ook nie om U stem en leiding in dié van mense te herken nie. Ek voel vasgevang en leef in dieselfde ritme en roetines wat my probleme veroorsaak. Wees vandag by my om my die pad in die woestyn te wys en my by die water uit te bring wat onverwags in die droogte van die plek wat ek myself bevind ontspring. Maak my gehoorsaam aan U, o Gees van nuwe lewensmoontlikhede.
Dagstuk | Donderdag 4 April 2024
Vandag se tema: Ek maak ‘n verskil as ek geestelik groei.
Romeine 12:2. Julle moenie aan hierdie sondige wêreld gelyk word nie, maar laat God julle verander deur julle denke te vernuwe. Dan sal julle ook kan onderskei wat die wil van God is.
Is ons besig om aanpassings te maak, of te verander? Daar is ‘n groot verskil tussen die twee. Dink aan al die omstandighede wat oor jou pad kom en van jou vra om aan te pas. Dit is nie gewoonlik iets waaroor ons opgewonde is, of self sou kies nie. Ons voel dikwels daarin gedwing omdat die wêreld waarin jy leef dit van jou vereis. Die woord “aanpas” laat my aan die klere dink wat ons aantrek en wat by verskillende geleenthede ‘n ander doel moet dien. Dit is tydelik en alhoewel ons van buite anders lyk bly ons dieselfde. Soos wat ons daagliks ons klere verwissel kry ons baie gedoen, maar maak ons ‘n verskil? Vandag se teksgedeelte moedig ons aan om ons oop te stel om te midde van invloede van buite deur die Here verander te word en nie net klere te verwissel of “aan te pas nie”. By watter plek van onderskeiding bring vandag se teksgedeelte jou uit? Hoe is die Here vandag diepliggend in jou vel en gedagtes besig?
Gebed
Here, ek bid dat u Gees my vandag so sal kom omvorm en herskep dat ek ‘n instrument wees wat werklik ‘n verskil kan maak. Wys my watter rol ek vandag kan speel om die wêreld as ‘n plek van korrupsie, lyding en verganklikheid te transformeer. Help my om nie net verby die gebeure van die dag te hardloop nie, maar dit versigtig te onderskei sodat ek vandag die potensiaal van nuwe lewe kan ontsluit.
Dagstuk | Woensdag 3 April 2024
Vandag se tema: Saam is ons beter en maak ‘n verskil.
1 Korintiërs 12:7 & 11. Aan elkeen afsonderlik word ‘n werking van die Gees gegee tot voordeel van almal. Maar al hierdie dinge is die werking van een en dieselfde Gees, wat aan elkeen afsonderlik ‘n gawe uitdeel soos Hy wil.
In my kinderjare het ons altyd tydens pouse sokker gespeel en dan twee spanne op die volgende wyse verkies. Die sterkste twee spelers is as kapteins aangewys waarna elkeen om die beurt geleentheid gekry het om die beste span saam te stel. Die outjies met talent wat doele kon aanteken is altyd eerste gekies en daarna die wat goed kon verdedig. Die laastes wat oorgebly het was dié met min of geen balvaardighede. Hulle het ook min kans gehad om te verbeter, want die bal is selde na hulle toe aangegee en moes meer geneë wees om agter die res aan te drentel. In die grootmens wêreld geld dieselfde beginsel steeds. Ons beoordeel mense op verskillende vlakke en tree daarvolgens teenoor hulle op. Die Here het bewustelik anders gekies toe Hy aan elkeen afsonderlik ‘n werking van die Gees gegee het wat tot voordeel van almal benut moet word. Nie op ons eie nie, maar saam is ons beter en maak ons ‘n verskil. Hoe praat hierdie gedeelte vandag met ons oor die mense saam met wie ons saamleef asook die wyse waarop ons ‘n verskil in die wêreld kan maak? Vandag se teks daag ons uit om die seën van diversiteit wat die Here in die kerk ingebou het te ontsluit en vanuit die seën daarvan te leef. Jou vriende kan jy kies, maar die mense wat elke dag oor jou pad kom is ‘n geskenk van God.
Gebed
O God, rus my vandag toe met eienskappe wat iets in my sal laat deurskemer van u lewe in my: die nederigheid wat my sal weerhou van verwaandheid en misplaaste trots; die grasie en sagtheid wat dit vir mense makliker sal maak om met my saam te leef; die toewyding en betroubaarheid wat van my ‘n goeie kollega en werknemer sal maak; die deernis en hulpvaardigheid wat vinnig sal raaksien waar en hoe ek ander kan help; die voortdurende bewussyn van u teenwoordigheid, sodat ek regtig ales sal doen soos vir U.