Gedagte vir die dag | Woensdag 24 Maart 2021
Jesaja 53:4. Tog het hy óns lyding op hom geneem, óns siektes het hy gedra. Maar ons het hom beskou as een wat gestraf word, wat deur God geslaan en gepynig word.
GEDAGTE
In Jesaja 53:4 het ons pas gelees dat Jesus ons lyding op Homself geneem het en dat Hy ons siektes gedra het. Daar was niks makliks hieraan nie. In die volgende vers lees ons dat Jesus deur óns oortredings deurboor is en dat Hy oor óns sondes verbrysel is. ’n Mens sou kon sê dat Jesus ter wille van ons gebreek was.
Indien ’n mens in die Nuwe Testament lees hoedat die Nagmaal ingestel word (Mark 6:41-44; 14:23, 24; Joh 6:11; Luk 24: 30; 1 Kor 11:24-26), vind jy altyd ’n viervoudige ritme wat deur vier werkwoorde verwoord word. Eerstens neem Jesus die brood. Dan dank Hy God daarvoor. Of Hy seën dit. Derdens breek Jesus die brood en laastens gee Hy dit aan sy dissipels: Neem, seën, breek en gee.
Jesaja 53:4 en 5 bring ons by die derde deel van die viervoudige ritme: Breek: Soos wat ons die brood breek by die gebruik van die Nagmaal, is Jesus vir óns gebreek. Maar ook óns word gebreek. Ons word gebreek vanweë ons sterflikheid en uiteindelik vanweë die feit dat ons in ’n onvolkome, sondige wêreld leef. By die nagmaal word ons gebreek en óópgebreek vir die Here. Hier kan ons nie na binne gekeer leef nie. Ons diepste bedoelings en menswees word onthul. En hier, in ons diepste binneste, werk die Here met ons. Bring die Here vergifnis, bevryding en genesing.
Dis swaar om te breek en oopgebreek te word. Pynlik. Maar wanneer dit gebeur, is die Here Jesus saam met ons. Hy neem ons lyding en ons siekte op homself. Hy is gebreek sodat ons nooit sónder Hom of finaal stukkend sal breek nie.
GEBED
“Here, U weet waarvan ons gemaak is, U hou dit in gedagte dat ons stof is. Maar onverganklik is U liefde vir ons Here. U is getrou en U neem ons sonde, siekte en dood op Uself… sodat ons kan lewe!
AMEN
Gedagte vir die dag | Dinsdag 23 Maart 2021
Filippense 1:12 & 13: “Ek wil hê julle moet weet, broers, dat wat my oorgekom het, juis die verkondiging van die evangelie bevorder het. Dit het daarop uitgeloop dat die hele keiserlike wag en al die ander nou besef dat dit ter wille van Christus is dat ek ‘n gevangene is. Deur my boeie is die meeste broers ook in hulle vertroue op die Here gesterk, en hulle waag dit al hoe meer om die woord van God onbevrees te verkondig.”
Halfvol of halfleeg?
Ek sluit graag hierdie afgelope paar dae se dagstukkies af met nog ’n laaste belangrike keuse. Ons het nou al gesels oor die keuses tussen reg en verkeerd? “Fans”, of “followers” en tussen toeskouers en spelers.
Vandag dink ons kortliks oor ons persepsies, of hoe ons na situasies kyk. Hoe ons ’n saak, of gebeurtenis sien en dan uiteindelik daaroor voel. Die keuse van persepsies – positief of negatief? Pessimisme of optimisme?
Ons almal ken die voorbeeld wat in die verband gebruik word, oor hoe ons die halfvol glas water sien – halfvol, of halfleeg. In baie kinderpreke, maar ook selfs in groot leierskap- en motiveringseminare is hierdie voorbeeld, of vergelyking al gebruik. Hoe kyk ek na ’n situasie en wat is my persepsie van ’n bepaalde situasie?
Hoe neem ek dit waar? Het ek ’n vuil, of donder bril aan wat alles donker en negatief kleur en dan ook bepalend word van hoe ek daaroor voel en dink. Sien ek pessimisties ’n halfleë glas?
Of dalk anders? Kyk ek na situasie op so ’n manier dat ek dit positief beoordeel. Sien ek die glas as halfvol! Hierdie positiewe uitkyk vul my nie net alleen met optimisme nie, dit skep ook vir my die moontlikheid om nuwe potensiaal en moontlikhede in die betrokke situasie te sien! Dit maak my ook sommer ’n blymoedige mens, want my positiewe uitkyk beïnvloed my ingesteldheid op die lewe en maak dit vir my ’n lekker ervaring.
Paulus het sy bril skoongemaak sodat hy die glas as halfvol kon sien. Sy omstandighede en situasie in die tronk was uiters sleg en negatief. Maar hy kyk op ’n bepaalde manier daarna om ongelooflike potensiaal in dit raak te sien en te erken. “Wat met my gebeur het,” sê Paulus, het die verkondiging van die Evangelie bevorder en uitgeloop daarop dat die Evangelie van Christus verkondig kon word. Hoe nodig in ons tyd is dit nie om die negatiewe gees rondom ons te vervang met positiewe denke en persepsies nie.
Gebed
Here, help my om my bril skoon te maak sodat ek die mooi en die positiewe in elke situasie kan raaksien. Amen
Gedagte vir die dag | Maandag 22 Maart 2021
Lukas 9:61: “En ’n ander een het ook gesê: Here, ek sal U volg, maar laat my eers toe om afskeid te neem van die wat in my huis is. Toe sê Jesus: “Iemand wat die hand aan die ploeg slaan en aanhou omkyk na wat agter is, is nie geskik vir die koninkryk van God nie.”
Gister het ons by die belangrike keuse: “fan” of “follower” stil gestaan. Vandag wil ons dit opvolg met die vraag: toeskouer, of speler?
Gister het dit duidelik geraak dat ons moet kies op watter wyse ons met Jesus geassosieer wil wees. Wil ’n mens iemand wees wat van ver af kyk en Hom op ’n afstand volg en hande klap, of wil jy iemand wees wat sy kruis opneem en agter Jesus in die stofpad van die lewe stap.
Net so belangrik is die keuse oor hoe ek betrokke wil wees in die koninkryk van God. Wil ek ’n toeskouer van God se werk wees, of wil ek my hand aan die ploeg slaan soos Jesus in hierdie teksgedeelte sê, en werklik diens verrig?
Almal van ons ken ’n sportwedstryd met toeskouers op die paviljoen en spelers op die veld. Ons ken ook die verskil tussen die twee groepe. Die spelers op die veld wy hulself aan die spel. Hulle werk hard aan die spel, druk in die skrum, gooi doele, of slaan die bal oor die net. Met sweet en inspanning verrig hulle hul taak om uiteindelik as oorwinnaars uit die wedstryd te tree.
Die Engelssprekendes het ’n baie mooi spreekwoord wat sê: “They put their body on the line.” Toeskouers is anders, hulle het ’n belang by die spel en bewonder die talent van die spelers. Die wedstryd is vir hulle mooi, daarom woon hulle dit by, maar hulle plaas nie hulle eie lywe op die spel nie. Hulle neem dit slegs van die kantlyn af waar, sonder om self te sweet en betrokke te raak.
Dit is ook waar van ons Christelike gemeenskap en selfs die kerk. Daar is diegene wat hulle hande vuilmaak met die harde werk in die koninkryk van God. Mense wat praktiese diens lewer om ’n verskil in die wêreld te maak en om aan God se koninkryk gestalte te gee. Dit verg baie keer sweet, geld, harde arbeid, tyd en inspanning. Is dit nie wat Jesus ook verwag van die mense wat Hom volg nie? Om ons kapasiteit en bronne so te bestuur dat die werk in die Koninkryk nie afgeskeep word nie.
Jesus verwag dat sy volgelinge ook toegewyde spelers op die veld sal wees. In ons veranderende tye is dit so nodig dat die liggaam van Jesus sigbaar moet wees, dat die sout en lig aktief ’n verskil in die wêreld moet maak. Dit kan nie net eensydig van die kantlyn af gedoen word nie. Dit vra mense om die stewels aan te trek, die raket op te neem en hul aan die taak toe te wy. Doen dit deur ander te dien, om uit te gaan om die Evangelie aan ander te verkondig, of diensbaar te wees deur klein dingetjies binne die gemeente, of gemeenskap te doen.
Weereens die vraag, met die keuse wat daarmee saamgaan: Speler, of toeskouer?
Gebed:
Here, help my om my hand aan die ploeg te slaan en diensbaar te wees in u koninkryk. Vergewe my as ek so maklik net van die pawiljoen af na die spel, kyk. Amen.
Gedagte vir die dag | Sondag 21 Maart 2021
Johannes 6:66: “Hieroor het baie van sy dissipels omgedraai huis toe en nie meer saam met Hom gegaan nie. Toe sê Jesus vir die twaalf: Wil julle nie ook weggaan nie?”
Gedagte: Fan or follower? Wat ’n belangrike keuse!
Miskien een van die belangrikste keuses wat ons ooit in ons lewens moet maak, is of ‘n mens ’n “fan” van Jesus, of ’n “follower” wil wees? Hierdie vraag het al so baie mense geïnspireer en gekonfronteer dat daar al verskeie TV-programme en boeke oor hierdie tema/keuse die lig gesien het. Is daar ’n verskil om ’n bewonderaar teenoor ’n volgeling te wees.
Ons almal ken “fans” as dit kom by sport- of supersterre. ’n Mens bewonder dikwels ’n beroemde rugbyspeler, of akteur. ’n Mens se bewondering vir hom of haar is dikwels gerig op al die goeie dinge wat die persoon kan doen, of talente wat hy of sy tentoonstel. Wanneer die persoon dan êrens optree of speel, dan klap ek in verwondering hande, sonder dat ek noodwendig die persoon ken. Ek sluit soms uit vrye keuse by sy/haar “fan-club” aan.
’n “Follower” is iets anders. Dit beteken dat ek die pad tree vir tree loop met die persoon wie ek wil volg. Dit is wanneer ’n mens bereid is om jou lyf op die spel te plaas, om bepaalde opofferinge te maak en bereid is om die lewenstyl en karaktereienskappe van die een wat ek volg, aan te neem.
Jesus het verseker ook ’n klomp “fans en followers” gehad. Dit was alreeds so toe Jesus nog op aarde was en baie mense hom begin volg het. Baie mense het hom begin volg en hande geklap oor dinge wat hy gedoen het. Hulle het begin om “fans” te word van die wonderwerker, of die geneesheer, die goeie Rabbi wat uitstekende preke gelewer het. Hulle het op die kantlyn gesit en luister, of gestaan en kyk en hande geklap vir die goeie goed wat Hy gedoen het. In verskeie teksgedeeltes in die Nuwe Testament sien ons dat daar baie dissipels van Jesus was, baie leerlinge en baie bewonderaars van die Wonderwerker!
Op ’n stadium het hulle besluit, sê ons teksvers, om weg te draai van Jesus af. Waarskynlik het hulle begin belangstelling verloor, of hulle het iemand anders raakgesien wat meer opwindend was en vir wie hulle eerder wou gaan hande klap. Miskien was hulle afgeskrik deur die geweldige eise wat Jesus aan die mense wat Hom wou volg, gestel het. Daar het egter ’n paar oorgebly wat volgelinge geword het en wat besluit het om Jesus in sy spore te volg, om sy eise vir dissipelskap en volgelingskap op hulle te neem. Om die kruis saam met Hom te dra en opofferings te doen.
Dit is vandag steeds die geval. In die Christen-gemeenskap is daar ook duidelike “fans en followers.” Daar is derduisende mense wat hul name opgee as Christene, bewonderaars van die goeie werke en dade wat Jesus gedoen het. Selfs in die kerk is hulle daar om Jesus te bewonder en om te kyk wat hulle dalk uit die transaksie kan kry. Maar wat Jesus soek is mense wat agter Hom sal aanloop, wat in sy ritme sal kom en die skaafmerke van sy kruis op hul skouers sal voel omdat hulle die opofferings maak wat Jesus van hulle vra.
As jy vandag na jouself kyk, na jou eie toewyding aan Christus, die praktyk van jou Christelike geloof, is jy ’n “fan” of “follower”?
Gebed
Here, help ons om vandag ook hierdie belangrike keuse te maak. Help ons om nie net hande te klap vir die goeie dinge wat gedoen is, of die wonderwerke wat U verrig het nie, maar dat ons werklik in die stofpad agter U sal aanloop, omdat ons volgelinge van ons Meester wil wees.
Amen.
Gedagte vir die dag | Saterdag 20 Maart 2021
Matteus 26:33: “Daarop het Petrus vir Hom gesê: ‘Al sal hulle U ook almal in die steek laat, ék sal U nooit in die steek laat nie.’ ”
As daar ooit iemand is wat voor baie keuses te staan gekom het, dan was dit Jesus se sterk dissipel, Simon Petrus. Van sy eerste ontmoeting met Jesus langs die visserswaters, moes hy al keuses gemaak het. Waarskynlik een van sy grootste keuses wat hy ooit moes gemaak het, was die keuse om die man van Nasaret, Jesus Christus, te volg. Die implikasie van hierdie besluit was dat hy alles moes los om Jesus te volg. Dit is lofwaardig!
Maar Petrus het ook ’n paar ander keuses en besluite gemaak wat nie so positief en lofwaardig was nie. Ons ken sy effense arrogansie en voor-op-die-wa- houding. Hy was die een wat dadelik uitbasuin het dat, al sou almal vir Jesus verlaat en in die steek laat, hy dit beslis nie sal doen nie. Miskien was hierdie keuse, of besluit, of aankondiging daarop gerig dat hy aandag op homself wou vestig, moontlik ’n stukkie propaganda vir ’n potensiële leiersposisie.
Verder sien ons dat Petrus in die drif van sy persoonlikheid, die verkeerde keuse gemaak het toe hy in Getsémané die slaaf van die hoëpriester se oor afgekap het. Hy het dit nie goed deurdink nie! Hy het die besluit om te veg, blindelings gemaak. Ons weet ook wat was Jesus se reaksie hierop gewees.
Die grootste hartseer was egter met die tragiese insident van Petrus se verloëning van Jesus. Hierdie ywerige, sterk, amper arrogante dissipel van Jesus vou onder die druk! Ons onthou hoe hy dramaties aangekondig het dat hy nooit vir Jesus in die steek sou laat nie, maar toe die druk toeneem en hy self in die gevaar kom van vervolging, toe vergeet hy daardie keuse wat hy gemaak het en hy trap in die strik waarin so baie van ons ook trap deur besluite onder druk te neem wat vorige besluite, of keuses kanselleer.
Ons leer so baie uit die verhaal van Petrus, ook later toe hy op die see uit die boot geklim het, om in voortvarendheid na Jesus te loop, om uiteindelik te sink, omdat sy geloof hom verlaat het.
Ek was self ook al baie keer in situasies waar ek keuses gemaak het met slegte uitkomstes. Die gevolge was gewoonlik baie tragies. ’n Keuse wat ons maak, moet te alle tye deurgevoer kan word. Die Engelssprekendes het ’n mooi gesegde wat sê: “You must walk the talk.” Jy moet ’n keuse maak, ’n besluit neem en ten alle koste daarby kan bly.
Hoe lyk die keuses wat ons elke dag maak oor ons volgelingskap van Jesus? Is daar nie by ons ook maar baie trekke van Petrus, wat vinnig onberekende besluite neem en dan later vou onder die druk nie? Jesus vra deurdagte keuses, keuses wat my lewe raak, keuses waarop sy koninkryk gebou kan word.
Gebed
Here, help my om reg te kies en daarby te bly.
Amen
Gedagte vir die dag | Vrydag 19 Maart 2021
Openbaring 3:15-16: “Ek weet alles wat julle doen. Ek weet dat julle nie koud is nie, en ook nie warm nie. As julle tog maar koud of warm was! Maar nou, omdat julle lou is, nie warm nie en ook nie koud nie, gaan Ek julle uit my mond uitspoeg.”
Vandag hanteer ons ’n baie interessante keuse. Dit is ’n keuse met drie moontlikhede: koud, lou, of warm. Dit klink amper soos die verstelling van lugversorging na die temperatuur van jou keuse. Ek het die vermoë om die knoppie te draai, deur die keuse wat ek maak.
By die gemeente se mannegebedsgroep het ons die afgelope tyd baie hieroor gepraat. (Ek wil sommer ook van die geleentheid gebruik maak om al die manne uit te nooi om in hierdie besondere belewenis, elke Donderdagoggend 18:00, te kom deel). Ons tema die afgelope paar weke was: “Wat is jou geestelike temperatuur?” Ons het ’n prentjie op ons notas van die Covid-19-protokol se termometer wat oral gebruik word. Ons gebruik ook hierdie teks om te sê daar is verskillende moontlikhede rakende ’n mens se geestelike temperatuur en toewyding aan God. Die aanduiders hiervan is my liefde vir God, my geloof in God, my gehoorsaamheid, gebed en diens.
Wat tog interessant is, is dat ’n mens self ’n keuse hierin het. ’n Mens draai self die knoppie om die temperatuur te bepaal en kan eintlik kies wat die uitkoms van die lesing gaan wees – warm, lou of koud? Dit is soos geestelike dissiplines, waar ek moet besluit hoe ek daaraan aandag gaan gee. Besluite oor my stilwordtye, my kwaliteittyd in God se woord, my diensbaarheid aan ander, ens.
Ons weet tog: Elke besluit of keuse, het ’n gevolg – ook in my geestelike lewe! As ek kies om baie min, of geen tyd aan my toewyding aan God te spandeer, my gebedslewe af te skeep, ens. sal dit op my geestelike termometer reflekteer en andersom ook.
Ook in hierdie teks, soos in vorige tekste waarna ons al gedurende hierdie week gekyk het, wil die skrywer ons aanmoedig om die regte keuse te maak. Om daaglikse keuses te maak oor hoe die kwaliteit van my geestelike oefenprogram moet lyk. Jesus verlang uiteraard dat ons “warm” moet wees, geestelik fiks moet wees, werklik toegewy aan Hom moet wees en naby aan Hom moet wees. Hoe ons met Hom praat, na Hom luister en hoe ons Hom dien?
’n Goeie vragie vandag: Hoe lyk jou lesing?
Gebed
Here die druk om ons raak so groot om gemiddelde mense te wees, met gemiddelde toewyding, lou geestelike temperatuur, omdat ons daagliks ’n klomp kompromieë met wêreldse standaarde maak. Help my om fiks te wees en warm te wees in my verhouding met U.
Amen
Gedagte vir die dag | Donderdag 18 Maart 2021
Joshua 24:15: “Maar as dit verkeerd is in julle oë om die Here te dien, kies dan vir julle vandag wie julle wil dien: òf die gode wat julle vaders daar oorkant die Eufraat gedien het, òf die gode van die Amoriete in wie se land julle woon; maar ek en my huis, ons sal die Here dien.”
Ons het gister met mekaar begin deel oor die belang en omvang van keuses in ons lewens. Om tussen verskeie moontlikhede te onderskei ten einde die regte keuse te maak.
Ons teksvers vandag (Joshua 24:15) is een van die mees bekende en mees pertinente verse oor keuses wat gemaak word! Dit is Joshua, die opvolger van Moses, wat hier teen die einde van sy lewe die grootste keuse ooit in sy lewe weer bevestig. Soos Moses, het hy ook maar met ’n weerbarstige volk gesukkel.
Dit was ook een van sy grootste uitdagings! Hy moes die volk wat hy lei, voortdurend aanmoedig om deurentyd die regte geloofskeuse te maak, want hulle het dikwels die verkeerde keuses gemaak oor wie hulle wil aanbid. Baie keer het hulle die gode van Egipte, of van die Amoriete gekies. Daar staan selfs in ons teksvers, dat dit vir sommige van hulle verkeerd was om die Here te dien! Hulle het Hom heeltemal gelos en van Hom weg beweeg. Dan, in desperaatheid, roep Joshua wat al ’n lang pad met die volk gestap het uit: “Nou moet julle kies: kies vandag wie julle wil volg! Dit is julle vrye keuse. Julle kan vandag teen God besluit, of vir Hom kies! Maar weet net verseker, ek het al lankal gekies en klaar gekies en bly by my keuse. Ek en my huis sal die Here dien!”
’n Aangrypende bevestiging van sy geloof. Hy en sy huismense sal nie onheilige kompromieë aangaan met alternatiewe geloofsmoontlikhede nie! Hulle sal ook nie uit God se spasie beweeg en Hom in ongeloof los nie. Hulle sal aanhou glo! Hulle kies om aan te hou om Hom te dien!
Vriende, so baie mense in ons tyd los die geloof en wil uit God se spasie weg vlug en sogenaamd “bevry” word. Selfs vooraanstaande teoloë loop hierdie pad.
In die onsekere, wankelende tyd waarin ons lewe, moet ons elkeen weer kies. Wat, of wie kies jy?
Gebed
Here help ons om soos Joshua met oortuiging te bevestig – ons kies die lewende Here.
Amen.
Gedagte vir die dag | Woensdag 17 Maart 2021
Psalm 1:6. “Waarlik, die Here lei die regverdiges op hulle pad, maar die pad van die goddeloses lei tot ondergang.”
Ons wil in die volgende paar dae praat oor iets waaroor ons elkeen daagliks praat. Iets wat ons elke dag mee te doen kry. Nee, dit is nie om te eet, of te slaap of te werk nie . . . dit is om te kies!
Van kleintyd af was dit al so – jy moet kies! Toe ons kinders was, was ’n mens se keuse miskien beperk tot om byvoorbeeld tussen roomys of ’n sjokolade by die kafee te kies. Later moet ’n mens tussen vakke begin kies, of by watter Universiteit ’n mens wil gaan studeer asook tussen beroepe, huise en klere.
Keuses is daagliks deel van ons lewens.
Maar daar is ook groter keuses soos lewenstylkeuses, geloofskeuses en die keuse van ’n lewensmaat. Ons wonder dikwels wat ons kan help om hierdie keuses te maak en om seker te wees dat dit ’n goeie, of die regte keuse is? Is dit akademiese kennis, of ondervinding, of logika wat ’n mens kan help?
As gelowiges is ons baie bevoorreg om te glo dat God ons met die groot keuses in ons lewens kan help. Sy Woord, (die Bybel) voorsien baie riglyne daarvoor, maar ook hoe om ons keuses in lyn te bring met sy wil. Verder gee Hy vir ons die Heilige Gees wat ons lei op maniere wat ons nooit gedink het moontlik is nie. Daar is een groot oproep uit die Woord hieroor: Kies reg! Kies die lewe!
Psalm 1 is ’n Psalm wat handel oor die regte keuses. Twee alternatiewe lewensmoontlikhede word uitgespel, (die ou vertaling het gepraat van die “twee weë”). Die een is die weg van die goddelose, wat hulle lewe sonde God wil leef. Dit is ’n keuse wat gekenmerk word deur nutteloosheid, ’n lewe wat soos kaf in die wind wegwaai. Die alternatief tot die keuse is hulle wat die pad van God kies, wat God erken as die bron van hul lewe en wat daaruit sinvolheid en vrug geniet.
Dan moedig die Psalmdigter sy lesers aan in vers 6: “Maak seker dat jy reg kies” Ook elkeen van ons! Toets jou keuses elke dag! Laat jou deur sy riglyne en Gees lei sodat jy die regte keuses maak.
Gebed
Here, help my in ’n deurmekaar tyd om reg te kies. Gee my die vermoë om te kan onderskei tussen my keuses en om dit altyd in lyn te bring met U wil vir my lewe.
Amen.
Gedagte vir die dag | Dinsdag 16 Maart 2021
Psalm 23:4: “Selfs al gaan ek deur donker dieptes, sal ek nie bang wees nie, want U is by my. In u hande is ek veilig.”
Ek wil teen die agtergrond van ons lydingstyd iets met u deel oor droefheid, en die feit dat niemand van ons daarvan gevrywaar word nie. Op een of ander tydstip van ons lewe, ervaar elkeen van ons droefheid, pyn, lyding, of seer. Dis ’n ervaring wat ons nie kan begin verstaan voordat ons self die paadjie geloop het nie.
Daar is egter sekere waarhede waarvan ons kan kennis neem, om ons te help in ons donkerste oomblikke van smart, alleenheid of eensaamheid. Dit sal ons ook help om begrip, vertroosting en bemoediging aan mense te gee wat saam met ons leef. Jesus het dit bewys toe Maria en Marta hulle broer Lazarus verloor het, en hy na hulle toe gegaan het. Hy het op so manier in hul droefheid gedeel, dat dit hulle werklik gehelp en getroos het.
As iemand na aan jou deur die dood weggeneem word, laat dit gebroke emosionele bande en ’n pynlike gevoel van verlies, droefheid en eensaamheid agter. Nie net die dood veroorsaak dit nie, maar die skielike verbreking van ’n liefdesverhouding, die verbrokkeling van ’n gesin, vriendskap, of enige ander vorm van verlies. Droefheid kan ook veroorsaak word deur die verlies van jou gesondheid, finansiële probleme, die verlies van jou werk, of skuldgevoelens oor ’n misstap wat begaan is. Die emosionele ervaring wat volg op ’n verlies noem ons droefheid en op een of ander tyd word dié emosie deur elkeen van ons beleef. Om droefheid te hanteer is nie so maklik nie.
Jay Adam beweer droefheid is ’n lewensskuddende pyn oor verlies, dit skeur jou lewe uitmekaar en skud jou tot in jou fondamente. Droefheid is niks minder as ’n aanslag op jou lewe self nie. Dit ruk jou tot stilstand. Die rouproses volg in reaksie op verlies. Dit sluit ’n emosionele reaksie in, sowel as aanpassings in jou denke tot daardie verlies. Jou gevoelens en gedrag word so wesenlik aangetas dat dit soms as ’n siektetoestand beskryf kan word. Die vraag is dan, of my en jou geloof ons in staat stel om die troos van Psalm 23:4 aan te gryp en dit ons eie te maak, “selfs al gaan ek deur donker dieptes sal ek nie bang wees nie, want U is by my, in U hande is ek veilig.”
Gebed: Here gee ons die genade om deur ons seer en ons pyn ons droefheid en swaar te verwerk. Dankie vir U teenwoordigheid juis in dit.
Amen.
Gedagte vir die dag | Maandag 15 Maart 2021
Timoteus 1:7: “Die Gees wat God ons gegee het, maak ons immers nie lafhartig nie, maar vul ons met krag en liefde en selfbeheersing.”
Ek wil ’n bietjie stilstaan by moed in tye van beproewing of wanneer dit moeilik gaan. Willem Nicol is ’n bekende predikant in die NG Kerk, maar sy pa dr. Willem Nicol senior, het blykbaar jare gelede tydens ’n toespraak op Stellenbosh gepraat oor die eienskappe van ’n held, maar oor spesifiek moed as ’n belangrike eienskap genoem. En om dit te verduidelik het hy vertel hoe hy eenmaal op ’n plaas buite Pretoria huisbesoek gedoen het. Hy sê toe hy by die eerste plaas inry, was daar ’n land vol waatlemoene. Die boer sê toe vir hom dat hy hoop om darem so 300 pond vir die waatlemoene te kry.
Na die besoek by die boer met die waatlemoene is hy toe na ’n ander plaas toe. Intussen het daar ’n geweldige haelstorm uitgebreek en toe hy later die middag weer by die waatlemoenland verby ry, sien hy net ’n papery van wit, rooi en groen op die land lê. Dis die hael het verwoesting gesaai. Hy besluit toe dat hy ’n goeie pastorale dominee is, en ry toe weer by die boer aan om met hom te simpatiseer oor die verlies. Toe hy met die boer gesels, sê die boer vir hom: “Ja dominee, ek het nou so gereken, as ek Maandag aartappels insit, dan behoort ek darem oor so drie maande weer ’n oes te kan insamel.” As jy wil vra wat moed en positiwiteit is – die boer se gesindheid illustreer dit voorwaar.
Boere ken dié afhanklikheid, van die Here. Aan die een kant om kop neer te sit en om vorentoe te gaan ten spyte van teleurstellings, en dit wat gebeur. Ons is in die lydingstyd en ons het die afgelope Sondag die vierde lydingskers doodgeblaas. Lydingstyd wil ons herinner dat Jesus Christus as mens die lydingspad geloop het. Hy kan met ons identifiseer, wat ook al die omstandighede is – of dit nou waatlemoene is wat stukkend geslaan word, en of dit ’n ander soort pyn, of seer, of krisis is, wat ’n mens beleef. Miskien is dit iets wat jyself, of jou kinders beleef, of dalk is dit net ’n worsteling.
2 Timoteus 1: “Die Gees wat God ons gee, maak ons nie lafhartig nie, maar vul ons met krag ook in die krisis, ook as ons voel ons verloor moed, met liefde en selfbeheersing.”
Mag die Here die genade vir my en jou gee om in ons laagtepunte, as ons deur beproewinge gaan, met krag, en liefde en selfbeheersing vervul te word.
Gebed
Here, gee ons die genade om met u krag en u selfbeheersing vervul te word. Dankie vir die gestalte van u genade en liefde, om groter as ons omstandighede en ons beproewing te wees. Gee vir elkeen van ons moed.
Amen.