Dagstuk | Dinsdag 27 Februarie 2024
Matteus 15: 10-11. Toe het Jesus die menigte nader geroep en gesê: Julle moet nou luister en mooi verstaan! Dit is nie wat by die mond ingaan wat die mens onrein maak nie. Maar wat by die mond uitkom, dit maak ‘n mens onrein.
Die eerste groep gelowiges het meestal uit ’n Joodse agtergrond gekom waarin God se heiligheid direk gekoppel was aan reinigings-rituele en streng voorskrifte rakende sekere kosse wat vermy moet word omdat geglo is dat dit jou onrein kan maak. Hierdie praktyk het later in die vroeë kerk tot groot spanning gelei, omdat nie-Jode wat van Jesus se navolgers deel geraak het, nie by hierdie riglyn gehou het nie. Jesus kom draai hierdie beginsel op sy kop wanneer Hy mense daarop wys dat kos ons nie onrein kan maak nie, maar wel die woorde wat by ons mond uitkom. Terwyl ons baie nougeset heilig probeer leef, besef ons dikwels nie watter impak ons woorde het nie. Dit gaan nie net hier oor die gebruik van vuil taal nie, maar veral ook die skade wat ons kan aanrig met woorde wat manipuleer, woorde wat spog, woorde wat selfgerig is. Lydenstyd vat ons op reis om meer bewustelik te lewe en ons lewensritmes daarvolgens aan te pas. Kom ons dink dus meer bewustelik vandag oor die woorde wat by ons mond uitkom en die versteekte bedoelinge wat daaragter lê.
Gebed
Here, ek het vandag my kanse verbeur, my tyd verspeel, my humeur verloor, my klagtes voor U opgestapel. Ek het baie gepraat sonder om te dink aan die effek van my woorde. Ek het my eie begeertes verwar met my diepste behoeftes. Wees my genadig. Vergewe my impulsiewe reaksies en woorde. Help my Here om perspektief te kry wat regtig belangrik is – en met die woorde wat vandag opbou, troos, bemoedig en inspireer. Amen.
Dagstuk | Maandag 26 Februarie 2024
Lydenstyd is tradisioneel ‘n tyd van die jaar waarin gelowiges hulle daarop instel om hulle normale lewensritmes te verbreek om te fokus op die wyse waarop Jesus se lyding en sterwe ons lewens vandag kom raak. Hierdie week se oordenkings praat met ons hieroor.
Matteus 11: 28-29. Kom na My toe, almal wat uitgeput en oorlaai is, en ek sal julle rus gee. Neem My juk op julle en leer van My, want ek is sagmoedig en nederig van hart, en julle sal rus kry vir julle gemoed.
Hoe reageer ons wanneer ons moeg, oorlaai en uitgeput is? Ons is gewoonlik kortaf, gejaagd, geïrriteerd en tree in ons eie belang op. Die kanse van konflik en frustrasie is dan altyd groot. Hierdie reaksies het weer op hulle beurt gevolge en skep benewens ons huidige uitdagings net meer probleme. Wanneer moegheid ons oorval is ons lywe ingestel op verdediging en aanval. Dit is onvermydelik dat ons gereeld in die lewe by plekke gaan kom waar ons oorlaai word en deur omstandighede uitgeput en moeg agtergelaat word. Hoe hanteer jy die uitputting en moegheid in jou lewe? Wat is dit wat jou krag op hierdie dag tap en waarna jy opsien? Ons kom selde by die punt uit om hierdie vraag te vra en fokus eerder net op die dag wat voorlê en om dit af te handel. Wanneer ‘n mens in die ritme kom om elke dag jou moegheid en laste vir jouself en God te erken is dit soos ‘n kraan wat jy oopdraai en waarin jy skielik van baie spesifieke dinge bewus word. Beleef hoe die Here se sagmoedigheid en nederigheid in jou lewe deurbreek wanneer jy waag om elke dag jou kommer, moegheid en skedule voor die Here te bring. Mag jy ervaar hoe dit jou krag gee om hierdie dag wat vir jou wag in te gaan met ‘n diep vrede wat nie deur omstandighede van jou weggeneem kan word nie.
Gebed
Vertraag my pas Here, maak my rustiger. Bring die wilde geklop van my hart tot bedaring deur my verstand vandag met u vrede te vul. Dwing my om stadiger te beweeg en elke oomblik van hierdie dag waarmee U my mee seën in te neem. Amen.
Dagstuk | Saterdag 24 Februarie 2024
Teks: Habakuk 2:20
Die Here is in sy heilige tempel: almal op aarde moet in sy teenwoordigheid stil wees
GEDAGTE
Hoe groot is God werklik? Waartoe is Hy in staat? Hoe kan ons ooit meet en waarteen sal ons Hom kan meet? Ons kan welvaart en rykdom meet en sê iemand is 10 biljoen rand sterk. Maar hoe sal ons God se grootheid kan uitdruk? Seker onmoontlik! Die enigste reaksie is stille verwondering. Soms is die enigste toepaslike reaksie op God se heiligheid stille eerbied.
Bonaventura, ’n 13e eeuse biskop, teoloog en filosoof, het van God gepraat as “die Een wie se middelpunt oral is en Sy omtrek nêrens”. Daarom, sê hy, is die oorsprong, grootsheid, veelvuldigheid, skoonheid, volheid, aktiwiteit en orde van alles wat geskep is, die “voetspore” en “vingerafdrukke” van God.
Waar word jy bewus van God se grootheid en almag? Waar slaan dit jou asem weg? Waar laat dit jou in stille verwondering? Soek na hierdie plekke waar jy in stilte God se grootheid kan inasem en jou siel ryklik kan verkwik.
GEBED
Ek wil stil wees, Here en op U wag. Ek wil stil wees dat ek kan verstaan wat in U wêreld gebeur. Ek wil stil wees om na aan die dinge te kom, aan al u skepsels, en hul stemme te hoor. Ek wil stil wees dat ek onder die baie stemme u stem kan herken. ―Toe alle dinge in diepe swye gewag het‖, sê die Woord, ―het van die goddelike troon, o Here, u almagtige woord gekom.‖ Ek wil stil wees en my daaroor verwonder dat U vir my ‘n woord het. Here, ek is nie werd dat U na my toe kom nie, maar spreek net een woord, dan word my siel gesond. Amen (Jorg Zink)
Dagstuk | Vrydag 23 Februarie 2024
Teks: Matteus 6:6
Nee, as jy bid, gaan na jou kamer toe, maak die deur toe en bid tot jou Vader wat jy nie kan sien nie. Jou Vader wat sien wat verborge is, sal jou beloon.
GEDAGTE
Die waarde wat stilte en rus vir moderne mense mag hê, moet nooit onderskat word nie. Daar is ‘n sin waarin stilte selfs ‘n belangrike sleutel tot sinvolle verandering in ons persoonlike lewe asook in ons samelewing kan bied.
Om mee te begin, bring stilte ons nader aan onsself. Gee dit perspektief. Help dit ons om eerliker en méér deursigtig te word. Dit is ook die pad waarop God die beste kans kry om ons met Goddelike liefde te bedien, sodat ons met groter deernis teenoor alle ander mense kan gaan leef.
Tereg skryf ‘n ou Siriese teoloog, Isaac van Nineve:
“As jy lief is vir die waarheid, word ‘n liefhebber van stilte. Want meer as baie ander dinge sal stilte vrugte oplewer wat die tong nie kan beskryf nie. In die begin mag dit moeilik wees. Dit mag selfs gebeur dat jy jouself moet forseer om stil te word. Maar as jy aanhou, sal daar iets in jou gebore word wat jou op ‘n onweerstaanbare manier telkens na die stilte sal terugbring.”
In ‘n samelewing waar baie mense in die meedoënlose sleurgang van werk of ‘n maalkolk van daaglikse plesier en verveling vasgevang is, bly dit ‘n tydige herinnering. Gun jou elke dag die oomblik van stilwees in jou binnekamer met God.
GEBED
Dankie Here vir die geskenk van stilte. Ek ontvang dit met ope arms. Amen
Dagstuk | Donderdag 22 Februarie 2024
Teks: Psalm 46:11 (NLV) Wees stil en weet Ek is God!
GEDAGTE
Het jy al in ’n donker vertrek gesit en na musiek geluister. Veral klassieke musiek klink net anders as jy in stil in ‘n donker vertrek sit en daarna luister. Dis asof die note en klanke lewendig word.
Een van die belangrikste dinge wat ons in ons wêreld vandag kan leer, is om stil te wees.
Ek glo dat een van die groot redes hoekom baie van ons so uitgebrand en uitgestres is, is omdat ons nie weet hoe om stil te wees nie. Deur tyd met God te spandeer leer ons Hom ken en leer ons hoe om Sy stem te hoor sodat Hy ons paaie kan aanwys.
Ons moet leer hoe om stil aan die binnekant te wees en in ‘n vredevolle plek te bly, sodat ons altyd reg is om God se stem te hoor. Baie mense hardloop vandag net van een ding tot die volgende. Omdat hulle nie weet hoe om stil te wees in hul gedagtes nie, weet hulle nie hoe om stil te wees in hul harte nie.
Dit is dikwels eers in werklike stilte wanneer ons tot rus kom en regtig luister dat ons God se stem hoor. Dat God ook die kans kry om met ons te praat en te bedien met Sy liefde en genade.
GEBED
Here, Ek raak doelbewus vandag stl by U. Voed my siel en gedagtes met U heilige stem. Amen
Dagstuk | Woensdag 21 Februarie 2024
Teks: Lukas 4:42. Teen dagbreek het Hy uitgegaan en na ‘n eensame plek toe vertrek.
GEDAGTE
Ek dink soms is ek en jy ons grootste vyand… ons verhinder soms die Gees van God, wat in ons woon, om Sy werk in ons en met ons te kan doen, want ons sukkel met die stil wees deeltjie.
En ek weet ek is nie die enigste een wat daarmee sukkel nie, want ons bly in ‘n wêreld met oorverdowende konstante lawaai. ‘n Wêreld waar stilte eintlik abnormaal geraak het. ‘n Wêreld waar stil wees en word ‘n doelbewuste besluit en keuse is.
Moeder Theresa wat gesê het:
“Jesus wag altyd vir ons in die stilte. In daardie stilte luister Hy na ons, daar praat Hy met ons siel en daar sal ons Sy stem hoor. In stilte vind ons nuwe krag en ware eenheid. Die krag van God om alles goed te doen, word ons s’n. Die eenheid van ons gedagtes met Sy gedagtes, van ons gebede met Sy gebede, ons dade met Sy dade, ons lewe met Sy lewe.”
Dit is so nodig dat jy die goeie gewoonte sal aanleer om elke dag tyd in te ruim om net stil by die Here te wees. Dit is die een plek waar jy net hoef te wees en nie hoef voor te gee en te presteer nie. Jy sien, prestasie, verdienste en voorgee maak ʼn mens moeg. By die Here kan jy net stilsit en rou eerlik wees. Hy ken in elk geval jou hart – die mooi en die lelike daarvan. Jy kan Hom in alles ken en Hom presies vertel wat in jou lewe aangaan en wat jou behoeftes is. Dis waar jy rustigheid kry – by God alleen.
GEBED
Dankie Here vir die oomblikke van stilte waar ek verkwik kan word vir my aardse lewe Amen
Dagstuk | Dinsdag 20 Februarie 2024
Teks: Lukas 5:16: Maar Hy het Hom altyd weer in eensame plekke afgesonder om daar te bid.
GEDAGTE
Jesus se lewe moes baie besig gewees het. Tog het Hy gereeld tyd gemaak vir stilte en om met God te praat. Dis asof ons nuwe geestelike krag kry en weer moed het vir die lewe. Dalk het God ons ook geskape met hierdie innerlike behoefte aan stilte.
’n Oostenrykse sielkundige, Satura, het gewerk met drie basiese menslike behoeftes:
- Ons het behoefte aan prestasie, ons wil dinge regkry, dinge bereik, dinge doen in die lewe – ons studies, ons werk, ons sport;
- Ons het ook ’n behoefte aan ekstase, aan opwinding, aan belewing, ons wil meegevoer word deur saamwees, deur musiek, deur vriende, deur verhoudings;
- Maar, dan het ons ook ’n behoefte aan enstase, ’n behoefte wat baie keer afgeskeep word; ons wil tot stilstand kom en tuis kom by onsself, as’t ware by jouself kuier, met jouself vriende maak, tot rus kom in jouself.
Maar, dit is juis waarmee ons sukkel. Ons kom moeilik tot stilstand. Ons kom moeilik tot rus. Ons kom moeilik tuis in onsself. Ons is so gewoond aan al die adrenalien wat deur ons are pomp dat ons nie kan stil word nie. Dit bly vir ons ‘n uitdaging.
Stilte is een van die skatte wat Christus aan Sy kerk gegee het. Jesus was vir ons hierin ‘n voorbeeld om telkemale hierdie skat te besoek. Is dit iets wat jy ook gaan doen?
GEBED
Waar stiltes is
Waar stiltes is en heilige wind
Waar stiltes is sal Hy jou vind
Met balsem en olie en ewige wyn
Waar angste van dolheid in die eenkant kom kwyn
Waar stiltes is en woorde van hoop
Is dit moontlik om weer jou siel terug te koop
(Koos van der Merwe)
Dagstuk | Maandag 19 Februarie 2024
https://youtu.be/185PAdVILcY
Goeie dag. Dit is ‘n nuwe week en so stadig maar seker beweeg 2024 ook aan. Ons is dan ook nou binne Lydenstyd in die kerklike jaar. Lydenstyd is vir my altyd ‘n tyd van stilwees en ootmoed. Daarom wil ek hierdie week met jou gesels rondom die waarde van stilte en alleentyd saam met die Here. Stilte en alleentyd het groot waarde. Mag jy hierdie week tyd kry om elke dag ‘n paar oomblikke doelbewus stil te word en die waarde daarvan te besef.
Teks: Jesaja 30:15
So het die Here my God, die Heilige van Israel, gesê: As julle julle bekeer en tot rus kom, sal julle gered word. Julle krag lê in stil wees en vertroue hê.
GEDAGTE
Lees dit weer: Julle krag lê in stil wees en vertroue. Herdie is soms vir ons ‘n uitdaging. Het ons dalk verleer om stil te word voor die Here? Kan ons nog op die Here wag? Kan ons nog stilword by die Here?
Die woord vir stil wees in Hebreeus beteken rus – kalm, op jou gemak, vry van alle angs. Nie baie Christene besit hierdie soort stil wees en vertroue wat hier beskryf word nie. Menigte van ons hardloop rond agter verskeie aktiwiteite aan en is in ‘n malle gejaag na rykdom, besittings en plesiere. Dit lyk of almal soek na oplossings, leiding en iets om hulle gees te kalmeer, maar hulle soek dit egter by allerhande ander bronne as by die Here. Maar God het reeds ‘n woord deur Jesaja tot ons gespreek vandag Hy moet die bron van ons krag en lewe wees.
Stel opnuut jou vertroue op die Here, wag vir die Here om dinge in jou lewe reg te maak op sy tyd. Hoekom? Omdat ons sekerheid van ons verlossing in Christus het, moet ons leer om stil te wees en om op God se tyd te wag. Sy beloftes staan vas, Hy is gretig om ons genadig te wees en Hom oor ons te ontferm. Ons krag is nie in self nie- maar dat ons op die Here kan wag.
GEBED
Here ek sukkel om stil te wees en te vertrou. Ek wil altyd dinge in eie hande hanteer. Leer my om in stilte op U te wag. Amen
Dagstuk | Saterdag 17 Februarie 2024
Vandag is Saterdag 17 Februarie. Elke reis het ’n stilhouplek nodig. Probeer vandag “unplug/ontrek” van die normale. Die ou geloofsvaders en moeders het geglo dat jy minstens een dag per week êrens in die natuur moet kom – dit dwing jou om na ander dinge te kyk as waarna jy gewoonlik kyk. In Genesis 15 as Abram by God kla, nooi God hom om na die sterre te kyk. Haal jou oogklappe af en kyk na die groter wêreld waarvan jy deel is. Gun jouself vandag ’n stilhouplek sodat jy die waarde van jou lewe kan oordink.
Genesis 15:5 “Toe het die Here vir Abram buitentoe laat gaan en vir hom gesê: ‘Kyk op na die hemel en tel die sterre as jy kan.’ Verder sê die Here vir hom: ‘So baie sal jou nageslag wees.’ Abram het toe in die Here geglo, en die Here het dit goedgevind dat Abram so volgens die wil van die Here gehandel het.”
Geloofsgewoontes help ons om in toewyding aan God en ons diens aan ons medemens te groei. Deur die eeue was daar veral 7 gewoontes wat gelowiges gehelp het om staande te bly. Drie het te doen met ons leefwyse en lewe: om te vas, om te gee en om die geloofsmaaltyd saam met medegelowiges te vier. Nog drie het te doen met die bestuur van ons tyd: vaste tye vir gebed, die viering van ’n rusdag en om die lewe volgens seisoene te leef. Die sewende gewoonte raak jou liggaam en tyd: ’n pelgrimsreis. Dit gaan oor hierdie vrae: Hoe maak ek ruimte vir God in my besige lewe?
My reis tydens lydenstyd begin deur Jesus te volg, en ook Sy gewoonte om na ‘n plek te gaan om te waak en te bid. Om Hom en Sy gewoontes te wil volg, moet ek eers dink dat Hy en die lewe wat Hy lei wonderlik is. As ek besef dat Sy lewe, en nie net wat Hy geleer het en die feit dat Hy gesterf het belangrik is nie, maar ook hoe Hy geleef het, sal ek Hom wil volg. Sy gewoontes bring my in kontak met die krag van gewoontes en met my eie gewoontes. Ek word na ‘n plek geneem waar ek ‘n diep begeerte kry om soos Hy te lewe, maar ek besef ek sal dit nie self kan regkry nie… Hy sal my moet help.
Wy nou die volgende paar minute wat jy het saam met Hom het aan Hom toe, deur jou voorneme en begeerte om net saam met Hom te wees met Hom te deel.
Wees net… soos jy kan… met Hom in gebed.
Dank Hom dat jy so saam met Hom kan wees en vra Hom vir dit wat jy nodig het vir die dag.
Amen.
Dagstuk | Vrydag 16 Februarie 2024
Vandag is Vrydag 16 Februarie. Die digter skryf: Vandag hier, môre nie meer nie… Ons hele lewe verloop tussen vandag en môre. Leef jy onnadenkend? Gaan jy onnadenkend met ander mense om? Hoe maklik kyk ek mis waar ek kon raaksien, stap ek verby waar ek kon stilstaan?
Thomas Merton skryf: “If you want to identify me, ask me not where I live, or what I like to eat, or how I comb my hair, but ask me what I am living for, in detail, and ask me what I think is keeping me from living fully for the things I want to live for.” Moenie jou kans op die lewe verspeel nie. Moenie met huiwering of onsekerheid leef nie. Wees gefokus, jou lewe is kosbaar. Bid saam met die Psalmdigter van Psalm 119:37: “Moet tog nie dat my lewe nutteloos wees nie.”
Ps 103:14-18 sê “Hy weet waarvan ons gemaak is, Hy hou dit in gedagte dat ons stof is. Die mens, sy lewensduur is soos dié van gras, soos dié van ’n veldblom wat oopgaan: as die woestynwind daaroor waai, is dit weg en sy plek vir altyd leeg. Maar onverganklik is die liefde van die Here vir dié wat Hom dien, sy trou vir opeenvolgende geslagte, vir dié wat getrou bly aan sy verbond en sy voorskrifte nakom.”
Doen ‘n refleksiegebed waar jy terugkyk na jou week. Wat het by jou gebly? Waaroor wonder jy?
Staan veral stil by oomblikke in jou week waar jy vertroosting beleef het of naby aan God gevoel het. Wat het hierdie oomblikke jou van God gewys?
Let dan ook op tye wat jy in kontak gekom het met ervarings van lyding. Sou jy so voel, bring dit weer voor die Here.
Gebed: Here, ek vra vir ‘n diep bewussyn van U liefde en werk in my lewe. Amen.