Teks:Matteus 22:39
En die tweede, wat hiermee gelyk staan, is: “Jy moet jou naaste liefhê soos jouself.”
GEDAGTE
Het jy al ooit daaraan gedink dat jy mag passievol wees oor jouself? Op die oog af klink dit ’n bietjie vreemd. Wat ek sê is dat jy mag ’n bietjie omgee . . . vir JOUSELF! Dit klink so selfsugtig. Want leef ons nie juis in ’n wêreld waar mense net vir hulself omgee nie? Ek bedoel, een van die grootste uitdagings van ons tyd is om mense te kry om vir ander mense om te gee en nie net vir hulself lief te wees nie. Daarom klink ’n oproep om vir jouself om te gee eenvoudig selfsugtig.
As jy ’n lysie van belangrike mense in jou eie lewe moet opstel, waar sal jy jouself plaas? Jy sal waarskynlik jouself sit na jou man, of vrou, of na jou kinders, jou ouers en miskien selfs na jou vriende, of selfs jou werksmense. Almal bo jou is die mense wat jy tevrede wil stel en gelukkig wil hou. Dikwels ten koste van jouself. Ons leef nie meer met passie teenoor onsself nie. Daar is altyd plek vir ander, maar min tyd en plek vir onsself.
Om vir jouself lief te wees en vir jouself om te gee het niks met selfsug te doen nie. Selfsug is wanneer jy net vir jouself omgee. Maar wanneer jy gehoorsaam is aan die wet van die Here dan sorg jy vir jouself sodat jy daardeur vir ander passievol kan omgee.
- Jy moet vir jouself sorg en na jou gesondheid kyk,sodat jou man of vrou, jou kinders en kleinkinders ’n kwaliteit lewe saam met jou kan geniet.
- Jy moet vir jouself sorg deur emosioneel te groei en dalk sekere slegte gewoontes af te leer, sodat jy ’n goeie man vir jou vrou en ouer vir jou kinders kan wees.
- As jy vir jouself sorg sal jy weer ’n geesgenoot vir iemand anders kan wees.
- Jy sien, jy kan nie gee as jy nie iets het om te gee nie. Jy kan nie vir jou naaste lief wees as jy nie vir jouself lief is nie. Jy moet die Here jou God liefhê en die tweede wat hiermee gelykstaan is, jou naaste soos jouself.
GEBED
Die Here het my mooi gemaak. Hy het my baie baie mooi gemaak. Dankie daarvoor Here. Amen