Hierdie week stap ons ’n pad met die gedagte van ’n pelgrimstog. Die afgelope week het groep mense van Stellenberg-gemeente en Klipheuwel saam op ’n staptog in die Outeniqua berge gegaan. Hierdie staptog is ingerig as ’n pelgrimstog, waar ons doelbewus op reis gaan om nader aan mekaar en nader aan God te kom. Elke dag in hierdie week staan ons stil by ’n ander teksvers rondom “op pad” wees.
Eksodus 40:36-37. 36Wanneer die wolk van die tabernakel af opgeneem is, het die Israeliete, op al hulle trekskofte, kamp opgebreek. 37Maar as die wolk nie opgeneem is nie, het die volk nie kamp opgebreek nie, tot die dag dat dit weer opgeneem is.
Refleksie
’n Pelgrimstog is ’n reis op pad na God, maar op jou pad kom jy ook tot die besef dat ’n pelgrimstog ’n reis sáám met God is. Hierdie teksgedeelte is ’n mooi voorbeeld daarvan. Met die uittog uit Egipte was die Israeliete op pad na iets toe – op pad na die land wat die Here vir Abraham beloof het. Maar hulle was elke tree ook op pad saam met God. Daar is ’n bekende aanhaling van Ralph Waldo Emerson wat sê: “It’s the not the Destination, It’s the journey.” ’n Pelgrimstog het gewoonlik ’n einde, maar die einde is gewoonlik nie die belangrikste nie – die hele reis is ’n proses van bewuswording dat God teenwoordig is.
Dit voel soms of ek verby my eie lewe leef, asof ek nooit regtig teenwoordig is in die hede nie, maar heeltyd vorentoe kyk na wat volgende kom. Ons almal ken die gevoel dat jy nie regtig ’n naweek kan geniet nie, omdat jy weet Maandag is op pad. Daar is selfs ’n term hiervoor in populêre sielkunde: bestemming verslawing of destination addiction.
Die teksgedeelte nooi ons om te sien dat die ritme van die lewe ’n ritme van reis en rus is. En hierdie ritme word nie bepaal deur ons eie behoeftes en begeertes nie, maar deur die leiding van die Here.
Waarheen roep God jou vandag? Roep hy jou om verder te gaan op jou reis? Of roep Hy jou om af te pak en te bly waar jy is? Dalk het jy nog nooit so daaraan gedink nie. Dalk nooi die teksgedeelte jou vandag uit om die vraag te begin vra: Wat roep die Here my om te doen, roep Hy my om te beweeg, of om te bly?
Mag ons leer om op ons reis, al hoe meer in ritme met God te leef en te leer om saam met Hom te beweeg en saam met Hom te bly.
Gebed
Here, partykeer raak ons so vasgevang deur wat volgende moet gebeur of wat ons volgende wil doen dat ons nie in die hede leef nie. Of partykeer volg ons net ons eie voete, sonder om eers bewus te raak van waarmee U besig is of waarheen U ons roep nie. Help ons om in ritme met U te leef, sodat ons beweeg wanneer U beweeg en rus wanneer U rus.
Amen.