Gebed en vra:
As kind het ek altyd gebid: “Here dankie vir die lekker dag, MAAR kan ek asseblief môre die volgende kry . . .” Die idee van vra en jy sal kry is al vir jare deel van ons gebedslewe. Is dit nie interessant hoe ons God vra om vir ons iets te doen nie, maar in dieselfde asem glo ons tog dat God reeds weet wat ons nodig het. Die vraag is dan: Waarom moet ons enigsins bid en vir iets vra as God reeds weet wat ons nodig het?
In die res van Psalm 22 hou David aan om te kla en dit neem hom 20 verse om vir God een ding te vra, naamlik: “Red my”. Dit blyk vir Dawid belangriker te wees om te praat oor wat hy beleef as om vir God te vra om vir hom iets te doen.
Psalm 22:12-22
“12Moet tog nie so ver van my af weg bly nie, want die nood is naby en daar is niemand wat help nie.
13’n Wreedaardige klomp mense het my omsingel, soos beeste uit Basan staan hulle my toe.
14Soos verskeurende, brullende leeus storm hulle met oop bekke op my af.
15Ek is soos uitgestorte water, al my bene het uitmekaar geval, my hart het soos was geword, dit smelt weg in my.
16Ek is so min werd soos ‘n potskerf, my tong kleef aan my verhemelte, U laat lê my asof ek dood is.
17Soos honde omsingel hulle my, die bende misdadigers sak op my toe, hulle bind my hande en voete vas.
18Al wat been in my is, kan ek tel; hulle kyk na my met leedvermaak.
19Hulle verdeel my klere onder mekaar en trek lootjies oor my mantel.
20En U, Here – moet tog nie so ver bly nie, Bron van my krag, help my tog gou!
21Red my van die swaard, my kosbare lewe uit die mag van die honde.
22Red my uit die bek van die leeu en tussen die horings van die wilde beeste uit.”
Gebed vir Dawid is duidelik nie daar om vir God te vra vir ’n beter werk, beter omstandighede of ’n beter lewe nie. Gebed is daar om ons te dwing tot introspeksie sodat ons sal begin nadink waarom ons vir God vra wat ons vra.
In hierdie tyd kan jy dink oor die goed wat jy vir God vra? Dalk is dit vrae waarop jy reeds die antwoorde het, of kan jy gebed gebruik om die antwoord te ontdek.
Mag gebed vir jou die ontdekkingsreis op jou vrae wees, soos dit vir die antieke mense was.
Kom ons bid saam:
Here ons bring in hierdie tyd ons diepste vrae en onsekerheid na U toe, nie om noodwendig die antwoord te ontvang nie, maar om dit te ontdek. Dankie dat U die God is wat saam met ons werk eerder as die God wat ons beheer. Amen.