Filippense 2:12-13. My geliefdes, julle was altyd gehoorsaam wanneer ek by julle was. Des te meer moet julle gehoorsaam wees nou dat ek nie daar is nie. Julle moet julle met eerbied en ontsag daarop toelê om as verloste mense te lewe, want dit is God wat julle gewillig en bekwaam maak om sy wil uit te voer.
Dit was Ghandi wat gesê het: Die Christus van die Christendom is aanbiddingswaardig, maar sommige Christene van die Christendom is afstootlik omdat hulle nie leef na die voorbeeld van Christus nie.
Mense kyk nie net na hoe ons as Christene lyk nie hulle kyk ook hoe ons optree. Hulle kyk wat ons doen, wat ons praat en wat ons dalk nie doen nie. M.a.w. hulle kyk watter voorbeeld ons stel. Vandag lees ons ook van Paulus wat die gemeente in Filippi oproep om ’n goeie voorbeeld te wees. Om te lewe as verloste mense.
Nou vra ’n mens jouself af: Wat is my voorbeeld as ‘n Christen? Ek dra die naam van Christen. Die vraag is of ek soos ’n Christen lewe? Watter voorbeeld sien ander in my lewe? Watter voorbeeld stel ek dalk vir my kinders, die leerlinge in my klas, of aan diegene wat nog as sondaars lewe? Watter voorbeeld stel ek vir my vriende, of vir my man of vrou? Wat sien mense in my lewe raak? Sien hulle die voorbeeld van Jesus Christus?
God vra van ons om die voorbeeld van Jesus Christus in hierdie wêreld uit te leef. Ek moet Jesus se voorbeeld in my huis uitleef, in my klaskamer, tussen my vriende, oral waar ek kom. Maar die enigste manier hoe ons dit sal regkry is met die genade van God. Paulus skryf in vers 13 “want dit is God wat julle gewillig en bekwaam maak om sy wil uit te voer”.
GEBED
Here help my asseblief om deur die manier wat ek lewe Jesus Christus as voorbeeld te volg.
AMEN