Die breër spasies van my aksies
Die fenomeen van sosiale media het die verkondiging van ons aksies vergroot. Dink ’n bietjie na aan hoe baie ons deesdae sien hoe goed, of gelukkig mense is deur die dinge wat ons op Facebook en op ander sosiale media platforms sien. Daar is niks fout daarmee nie, maar aksies wat meer ruimte het en jou laat groei in jou menswees is aksies wat jou amper dwing in ongemaklikheid in. Die Ierse Teoloog, Peter Rollins sê dat mense geloof in iets verander het wat vir ons sekerheid en satisfaksie moet gee. Ons hou nie daarvan as geloof ons los met onsekerheid of ontevredenheid nie. Rollins argumenteer dat dit is juis wat Christus vir ons aan die kruis gedoen het. Jesus het ons kom konfronteer met die onsekerheid van hoe groot die koninkryk van God werklik is, maar ook met die dissatisfaksie van die kontak met die uitgestote mense van die samelewing.
Die skrywer van Jakobus het iets hiervan verstaan toe hy gepraat het van geloof wat moet oorloop in dade.
Jakobus 2:14-17. 14. Wat help dit, my broers, as iemand beweer dat hy glo, maar sy dade bevestig dit nie? Kan so ‘n geloof ‘n mens red? 15Sê nou daar is ‘n broer of ‘n suster wat nie klere het nie en dag vir dag honger ly, 16. en sê nou een van julle sou vir hulle sê: “Mag dit met julle goed gaan; gaan trek julle warm aan en eet genoeg,” maar julle gee nie vir hulle wat hulle nodig het om van te lewe nie, wat help dit dan? 17. So gaan dit ook met die geloof: as dit nie tot dade oorgaan nie, is dit sonder meer dood.
Ons kan selfs sê dat dit help nie ons dade is mooi, maar daar is geen geloof nie. So asof die skrywer ons wil dwing na meer ruimte in die manier hoe ons, ons geloof in dade omsit. Die Bybel dwing ons eintlik om ruimtes binne ons aksies te skep. Ons moet op so ’n manier optree dat dit ons konfronteer met die ongemak en die onsekerheid waarmee Jesus ons kom konfronteer het. Hoe lyk daai ongemak en onsekerheid tydens die pandemie?
Gebed:
Here, dankie dat ons geloof ons kom konfronteer met die rou realiteit van die lewe. Nie met valse persepsies van hoe goed alles is nie, maar hoe stukkend en ongemaklik dit soms kan wees. Dankie dat U ons nooi om die spasie in ons aksies te verbreed sodat ons meer en meer soos U kan wees.