Matteus 27:45. “Van twaalfuur af het daar duisternis oor die hele land gekom, en dit het tot drie-uur geduur. Teen drie-uur het Jesus hard uitgeroep: Eli, eli lema sabagtani? Dit is: My God, my God waarom het U My verlaat? Jesus het weer hard uitgeroep en die laaste asem uitgeblaas.”
Ek is die afgelope paar weke met die skielike en onverwagse afsterwe van ’n paar mense in ons gemeente, wat ek goed geken het, gekonfronteer. Alhoewel ek oor die jare as predikant gereeld met dood gekonfronteer is, het die sterftes van mense in hierdie afgelope weke die asem uit my weg geslaan. ’n Mens is sprakeloos en kry niks konstuktief uitgerig nie.
Dit was Jesus se ervaring ook toe hy die woorde in die teksgedeelte na God uitgeroep het: “My God, my God, waarom het U my verlaat”. Die boodskap van die teks is nie dat dood en duisternis God se mag in hierdie paar oomblikke oorwin het nie. Eerder dat God gekies het om die volle impak van lyding te voel, sodat ons daarin nooit deur God self verlaat sal voel nie. Waag dus om ook hierdie woorde van Jesus op jou lippe te neem wanneer jou asem deur die onverstaanbaarheid van lyding weggeslaan word. Beleef hoe die laaste asem wat Jesus aan die kruis uitblaas weer die lewe in jou laat verrys.
Gebed
Op berge en in dale, en oral is my God God. Waar ons ook telke male, mag swerwe daar is God. Waar ons gedagtes swewe of styg, ook daar is God. Om laag en hoog verhewe, ja, oral is my God.