Spreuke 6:20-22: My seun, hou vas aan wat jou vader jou voorskryf; wat jou moeder jou leer, moet jy nie in die wind slaan nie. Dit moet jou altyd bybly, daarmee moet jy saamleef; dit sal vir jou leiding gee in wat jy doen, dit sal jou beskerm as jy slaap en jou lei sodra jy wakker word.
Ons het die afgelope paar Sondae ’n preekreeks oor verskillende Bybelkarakters wat transformasie, of verandering beleef het en ’n besondere pad met die Here geloop het, aangebied.
Verlede Sondag het my kollega, René, by Maria Magdalena stilgestaan en ek het in die kerk aan my ma wat altyd in November verjaar het, gedink. Sy is reeds ’n hele paar jaar gelede oorlede en dit het my oor vroue en die rol wat vroue speel, laat dink. Die Russiese leier Joseph Stalin het destyds na die dood van sy vrou gesê: “Sy was die een mens wat my klipsteen hart kon sag maak, maar nou is sy dood en saam met haar het al my gevoelens vir die mensdom gesterf.” Dit is hartverskeurend dat hy so reageer het. Hy het van sy eerste vrou, Katrina Svanidje, met wie hy net ’n jaar getroud was, gepraat. Sy was blykbaar ’n liefdevolle en ’n baie diep gelowige vrou gewees.
’n Mens wonder of die geskiedenis ooit anders sou verloop het as hy sy vrou nie so jonk verloor het nie? Miskien sou hulle saans in die bed gelê het en hy sou vir haar vertel het wat hy gedoen het en wat hy beplan. Gewoonlik praat ’n mens met jou vrou oor sulke goed. ’n Mens dink aan die honderdduisende mense, veral Russe, wat onder kommunisme gesterf het en kan eintlik net spekuleer wat sou gebeur het indien sy vrou langer gelewe het.
Elkeen van ons kan vertel van die invloed van ouers, maar dan in die besonder van ’n ma. Ek sien dikwels wanneer mense kerk toe kom, die rol van ’n ma, en hoe hulle hul kinders hanteer en word dan opnuut weer bewus van ’n vrou se rol in die huis en die invloed wat hulle spesifiek op kinders het. In krisistye in die geskiedenis was dit telkens vroue wat ongelooflike geestelike en daadkrag openbaar het. Daar is honderde voorbeelde om op te noem. Dit is vrouens wat telkens, toe mans gehuiwer het, wiele aan die rol gesit het. Dit is die geesteskrag van die vrou wat haar in staat stel om te veg vir dit wat vir haar dierbaar is, en om uit te hou tot die bitter einde.
Maria, Jesus se ma was een van die laastes wat by die kruis op die heuwel gestaan het. Ons is almal bewus van die besondere rol, eintlik die inspraak wat sy vir die Katolieke gelowiges het. Dit is nie deel van ons teologie nie, maar in ’n groot deel van die Christelike geloofstradisie speel Maria ’n besondere rol. En voor haar lees ons van baie ander vroue, Deborah, Rut en Ester wat in die Bybelse tyd die geskiedenis van die volk van die Here bepaal het. Meeste van ons ken die gedeelte in Spreuke 31:10 & 17: “’n Knap vrou is baie werd, baie meer as edelstene. Sy pak die werk aan met krag, haar hande staan vir niks verkeerd nie.”
Met die onrus wat in Brackenfell hier naby ons gebeur het en met mense wat mekaar opstook, besef ons opnuut dat ons die geesteskrag en invloed van gelowige vroue broodnodig het. Hulle wat hul kinders kan kalmeer, en ’n ander perspektief kan gee. Abraham Lincoln, miskien die grootste Amerikaanse leier van alle tye, het vertel dat sy ma se gebede hom deur sy hele lewe agtervolg het. Dit is ook bekend dat die kerkvader Augistinus se lewe eers op 32 jarige ouderdom op koers gekom het, ook danksy sy ma se aanhoudende gebede.
Miskien is jy ’n ma met kinders, of ’n vrou sonder kinders, of dalk dink jy vandag aan die besondere rol wat jou ma in jou eie lewe gespeel het. ’n Ma wat op haar knieë was, jou aan haar bors gevoed het, ’n baba kos gegee het, wat jou in die aand toegemaak het en vertroos het. Iemand wat vir jou gebid het wanneer jy nie eers daarvan geweet het nie. Wie se trane dalk oor jou gerol het. Kom ons sê vandag spesifiek dankie vir ’n ma wat oorlede is en waarvoor ons die Here kan dank. As jy self ’n ma is, dankie vir die rol wat jy speel. Maar kom ons bid ook in die besonder vir gelowige ma’s en meer spesifiek vir ma’s met klein kindertjies in die uitdagende tye. Veral vir ma’s wat tuis is en baie balle in die lug moet hou. Kom ons bid vir ma’s wat nie ondersteuning van hul mans kry nie, en ons loof die Here vir die dinamiese daadkrag, opofferende diens en menslike warmte wat soveel vroue vandag vir gesinne en vir families gee.
Gebed:
Here ons loof U vir die rol wat vrouens speel. Dankie vir die gebede van gelowige vrouens. Baie dankie vir die wete, dat U, U hand in besonder hou oor jong, werkende ma’s. Ons bid vir wysheid, ons bid vir krag en perspektief. Ons bid vir ondersteuning van hul gades. Ons bid ook vir enkelma’s wat swaar kry. Dankie vir elke gelowige vroue. Amen.